ലക്നൗ: ഉത്തര്പ്രദേശിലെ കസ്ഗഞ്ച് ജില്ലയില് കഴിഞ്ഞ ദിവസം ഇരു വിഭാഗങ്ങള് തമ്മിലുണ്ടായ സംഘര്ഷ൦ തുടരുന്നു . അക്രമം തുടരുന്ന സാഹചര്യത്തില് സുരക്ഷാ നടപടികളുടെ ഭാഗമായി ജില്ലയില് ഇന്റര്നെറ്റ് സംവിധാനങ്ങള് വിച്ഛേദിച്ചിരിക്കുകയാണ്.
ജില്ലയില് 144 പ്രഖ്യാപിച്ചിട്ടുണ്ട്. കഴിഞ്ഞ ദിവസം വെടിയേറ്റു മരിച്ച ചന്ദന് ഗുപ്തയുടെ സംസ്കാര ചടങ്ങുകള്ക്കു ശേഷമാണ് ഇരു സമുദായങ്ങള് തമ്മില് വീണ്ടും സംഘര്ഷം പൊട്ടിപ്പുറപ്പെട്ടത്.
ശനിയാഴ്ച നടന്ന ശവസംസ്കാര ചടങ്ങുകള്ക്കു ശേഷം കസ്ഗഞ്ച് നഗരത്തിലെ പ്രധാന മാര്ക്കറ്റിലുള്ള നിരവധി കടകള് അക്രമണകാരികള് തീവെച്ചു നശിപ്പിച്ചു. രണ്ടു ബസുകളും അഗ്നിക്കിരയാക്കിയതായി റിപ്പോര്ട്ടുണ്ട്. ശനിയാഴ്ച രാത്രിയും നഗരത്തിന്റെ പലയിടങ്ങളിലും അക്രമങ്ങള് തുടരുകയാണെന്നാണ് റിപ്പോര്ട്ടുകള് സൂചിപ്പിക്കുന്നത്.
വെള്ളിയാഴ്ച റിപ്പബ്ലിക് ദിനത്തോടനുബന്ധിച്ച് അനുമതിയില്ലാതെ നടത്തിയ റാലിക്കിടെയാണ് നെഞ്ചില് വെടിയേറ്റ് 22 കാരനായ ചന്ദന് ഗുപ്ത മരിച്ചത്. തുടര്ന്നാണ് ഇരു ഇരുവിഭാവും തമ്മില് സംഘര്ഷം രൂക്ഷമായത്. തിരങ്കയാത്ര എന്ന പേരില് ഒരു വിഭാഗം നടത്തിയ ബൈക്ക് റാലിക്കിടെ ഉയര്ന്ന ചില മുദ്രാവാക്യങ്ങളാണ് സംഘര്ഷത്തിന് കാരണമായതെന്ന് പോലീസ് പറഞ്ഞു.
അക്രമ സംഭവങ്ങളുമായി ബന്ധപ്പെട്ട് ശനിയാഴ്ച വൈകുന്നേരം വരെ 49 പേരെ പോലീസ് അറസ്റ്റ് ചെയ്തതായി കാസ്ഗഞ്ച് ജില്ലാ മജിസ്ട്രേറ്റ് ആര് പി സിങ് വ്യക്തമാക്കി.
അക്രമങ്ങള് നടത്തുന്നവര്ക്കെതിരെ ശക്തമായ നടപടികള് കൈക്കൊള്ളുമെന്ന് പോലീസ് മുന്നറിയിപ്പു നല്കിയിട്ടുണ്ട്. അക്രമം നിയന്ത്രണവിധേയമാക്കുന്നതിന് സംസ്ഥാനത്തിന്റെ വിവിധ ഭാഗങ്ങളില്നിന്ന് പോലീസ് സേനയെ കസ്ഗഞ്ചിലേയ്ക്ക് എത്തിച്ചിട്ടുണ്ട്.