മലപ്പുറം ജില്ലയുടെ ചില പ്രദേശങ്ങളില്‍ വെള്ളിയാഴ്ച രാത്രി ഭൂചലനം അനുഭവപ്പെട്ടു; ഇടിമുഴക്കമാണെന്ന് കരുതി വീടുകള്‍ക്ക് പുറത്തിറങ്ങി നോക്കിയപ്പോഴാണ് ഭൂചലനമാണെന്ന് മനസ്സിലായതെന്ന് നാട്ടുകാര്‍

മലപ്പുറം: മലപ്പുറം ജില്ലയുടെ ചില പ്രദേശങ്ങളില്‍ വെള്ളിയാഴ്ച രാത്രി ഭൂചലനം അനുഭവപ്പെട്ടു. കുറ്റിപ്പുറം, ഭാരതപ്പുഴയുടെ തീരത്തുള്ള ചില പ്രദേശങ്ങള്‍, എടപ്പാള്‍ എന്നിവിടങ്ങളിലാണ് ഭൂചലനം ഉണ്ടായതെന്ന് നാട്ടുകാര്‍ പറയുന്നു.

ചിലയിടങ്ങളില്‍ വന്‍ മുഴക്കത്തോടെ ഭൂചലനം അനുഭവപ്പെട്ടത്. രണ്ട് സെക്കന്റ് ദൈര്‍ഘ്യം ഉണ്ടായിരുന്നു. കട്ടിലുകളിലും കസേരകളിലും ഇരുന്നവര്‍ക്ക് നേരിയ തോതിലുളള തരിപ്പനുഭവപ്പെട്ടു. പ്രദേശവാസികള്‍ പരിഭ്രാന്തിയിലായി.

പരിഭ്രാന്തരായ ജനങ്ങള്‍ ഇടിമുഴക്കമാണെന്ന് കരുതി വീടുകള്‍ക്ക് പുറത്തിറങ്ങി നോക്കിയപ്പോഴാണ് ഭൂചലനമാണെന്ന് മനസ്സിലായത്. കുറ്റിപ്പുറം, ചേകന്നൂര്‍, തവനൂര്‍, മംഗലം, തൃപ്രങ്ങോട്, പുറത്തൂര്‍,ആലത്തിയൂര്‍, കട്ടച്ചിറ, തിരുന്നാവായ തുടങ്ങിയ സ്ഥലങ്ങളിലാണ് ചലനം വ്യാപകമായി അനുഭവപ്പെട്ടത്. തവനൂര്‍ പഞ്ചായത്തിന്റെ തെക്ക് പടിഞ്ഞാറ് മേഖലകളിലും ഭൂമി കുലുക്കം നാട്ടുകാര്‍ക്ക് വ്യാപകമായി അനുഭവപ്പെട്ടു .

എടപ്പാള്‍, അണ്ണക്കമ്പാട്, കണ്ടനകം, വട്ടംകുളം, കാലടി, പടിഞ്ഞാറങ്ങാടി, തവനൂര്‍, മൂവാകര ആനക്കര, ചങ്ങരകുളം പ്രദേശങ്ങളില്‍ ഭൂമികുലുക്കം അനുഭവപ്പെട്ടതായി നാട്ടുകാര്‍ പറയുന്നു. ജില്ലാ ദുരന്ത നിവാരണ അതോറിറ്റി ഭൂചലനവുമായി ബന്ധപ്പെട്ട വിവരങ്ങളൊന്നും പുറത്തുവിട്ടിട്ടില്ല.