ഡല്ഹി: ക്രിമിനല് നിയമങ്ങള് പരിഷ്കരിക്കാന് ലക്ഷ്യമിട്ട് കേന്ദ്രസര്ക്കാര് കൊണ്ടുവന്ന ബില്ലുകള് ഇന്ന് രാജ്യസഭയില്. ഭാരതീയ ന്യായസംഹിത, ഭാരതീയ നാഗരിക സുരക്ഷാസംഹിത, ഭാരതീയ സാക്ഷ്യ ബില്ലുകള് ഇന്നലെ ലോക്സഭയില് പാസാക്കിയിരുന്നു.
1860-ലെ ഇന്ത്യന് ശിക്ഷാനിയമവും (ഐ.പി.സി.), 1898-ലെ ക്രിമിനല് നടപടിച്ചട്ടവും (സി.ആര്.പി.സി.), 1872-ലെ ഇന്ത്യന് തെളിവ് നിയമത്തിനും പകരമായിട്ടാണ് യഥാക്രമം ഭാരതീയ ന്യായ സംഹിത (ബി.എന്.എസ്.), ഭാരതീയ നാഗരിക് സുരക്ഷാ സംഹിത (ബി.എന്.എസ്.എസ്.), ഭാരതീയ സാക്ഷ്യ (ബി.എസ്.) എന്നീ നിയമങ്ങള് കേന്ദ്ര ആഭ്യന്തരമന്ത്രി അമിത് ഷാ രാജ്യസഭയില് അവതരിപ്പിക്കുക.
പുതിയ ബില്ലുകള് പ്രകാരം ഒരു വ്യക്തി പരാതിപ്പെട്ടതിനു ശേഷം കേസുകള് രജിസ്റ്റര് ചെയ്യുന്നതിന് മൂന്നു മുതല് 14 ദിവസം വരെയേ എടുക്കാവൂ. മൂന്ന് ദിവസത്തിനുള്ളില്, അല്ലെങ്കില് പരമാവധി 14 ദിവസത്തിനുള്ളില് എഫ്ഐആര് രജിസ്റ്റര് ചെയ്യണമെന്നാണ് വ്യവസ്ഥ.
മൂന്ന് മുതല് ഏഴ് വര്ഷം വരെ ശിക്ഷ ലഭിക്കാവുന്ന കേസുകളില്, പ്രാഥമിക അന്വേഷണം 14 ദിവസത്തിനകം പൂര്ത്തിയാക്കണം. കുറഞ്ഞ ശിക്ഷയുള്ള കേസുകളില് മൂന്ന് ദിവസത്തിനകം എഫ്ഐആര് ഫയല് ചെയ്യണം.