കാസര്കോട്: കാസര്കോട് ഷവർമ്മ കഴിച്ച് ഭക്ഷ്യ വിഷബാധയേറ്റ് വിദ്യാര്ത്ഥിനി മരണമടയുകയും നിരവധിപേര്ക്ക് അസുഖം ബാധിക്കുകയും ചെയ്ത സംഭവത്തിൽ സ്ഥാപനത്തിനെതിരെ പൊലീസ് കേസ് രജിസ്റ്റർ ചെയ്തു. കടയിലെ രണ്ട് ജീവനക്കാരെ കസ്റ്റഡിയിലെടുത്തു.
ഷവർമ ഉണ്ടാക്കുന്ന നേപ്പാൾ സ്വദേശി സന്ദേശ് റായ്, സ്ഥാപനം നടത്തിപ്പുകാരൻ ഉള്ളാളിലെ അനസ് എന്നിവരെയാണ് പൊലീസ് കസ്റ്റഡിയിലെടുത്തത്. കടയുടമ വിദേശത്താണെന്നു പൊലീസ് പറഞ്ഞു. പ്രതികൾക്കെതിരെ മനപൂർവമല്ലാത്ത നരഹത്യാകുറ്റം ചുമത്തും.
ചെറുവത്തൂരില് ഭക്ഷ്യവിഷബാധയേറ്റ് ചികിത്സ തേടിയവരുടെ എണ്ണം 31 ആയി. ഭക്ഷ്യവിഷബാധ മൂലം കണ്ണൂർ കരിവെള്ളൂർ പെരളം സ്വദേശി 16 വയസുകാരി ദേവനന്ദ മരിച്ചിരുന്നു. കഴിഞ്ഞ വെള്ളിയാഴ്ച ചെറുവത്തൂർ ഐഡിയൽ ഫുഡ് പോയിന്റിൽ നിന്ന് ഷവർമ കഴിച്ചവർക്കാണ് ഭക്ഷ്യവിഷബാധയേറ്റത്.
അതേസമയം, വിദ്യാർഥിനി മരിക്കുകയും നിരവധി പേര്ക്കു അസുഖം ബാധിച്ചതുമായ സംഭവത്തില് അന്വേഷിച്ച് റിപ്പോര്ട്ട് നല്കാന് ഭക്ഷ്യസുരക്ഷാ കമ്മിഷണര്ക്കു ആരോഗ്യ മന്ത്രി വീണാ ജോർജ് നിര്ദേശം നല്കി.