മലപ്പുറം; കരിപ്പൂരിൽ വിദേശത്തുനിന്നെത്തിയ യാത്രക്കാരനിൽനിന്ന് കണ്ടെടുത്ത സ്വർണം കാണാതായ സംഭവത്തിൽ വിമാനത്താവളത്തിലെ ഉന്നത കസ്റ്റംസ് ഉദ്യോഗസ്ഥർക്ക് സസ്പെൻഷൻ. മൂന്ന് സൂപ്രണ്ടുമാരെയാണ് അന്വേഷണ വിധേയമായി സസ്പെൻഡ് ചെയ്തത്.
യാത്രക്കാരനിൽനിന്ന് കണ്ടെടുത്ത് കസ്റ്റംസിന്റെ ലോക്കറിൽ സൂക്ഷിച്ച ഒരു കിലോയോളം സ്വർണമാണ് കാണാതായത്.
തുടർന്ന് ആഭ്യന്തര അന്വേഷണം ആരംഭിച്ചിരുന്നു. സംഭവത്തിൽ കൊച്ചി കസ്റ്റംസ് കമീഷണറേറ്റിൽനിന്ന് റിപ്പോർട്ട് തേടിയിരുന്നു. തുടർന്ന് വകുപ്പുതലത്തിൽ നടന്ന പ്രാഥമിക അന്വേഷണത്തിനൊടുവിലാണ് മൂന്നുപേരെ സസ്പെൻഡ് ചെയ്തിരിക്കുന്നത്.
വിശദ അന്വേഷണവും ആരംഭിച്ചിട്ടുണ്ട്. കൂടുതൽ വിശദാംശങ്ങൾ അധികൃതർ പുറത്തുവിട്ടിട്ടില്ല. കഴിഞ്ഞവർഷം സി.ബി.െഎ-ഡി.ആർ.ഐ സംയുക്ത പരിശോധനയുടെ അടിസ്ഥാനത്തിൽ കരിപ്പൂരിൽ നിരവധി കസ്റ്റംസ് ഉദ്യോഗസ്ഥരെ സസ്പെൻഡ് ചെയ്തിരുന്നു. സ്വർണ കടത്തിന് ഒത്താശ നൽകിയെന്നതിനെ തുടർന്നായിരുന്നു അന്ന് നടപടി.