കൊച്ചി: കൊച്ചിയില് രണ്ടിടങ്ങളിലായി റെയില്വേ പാളത്തില് മൃതദേഹങ്ങള് കണ്ടെത്തി. നെടുമ്പാശേരിക്കടുത്ത് നെടുവന്നൂരില് റെയില് പാളത്തില് 30 വയസ് തോന്നിക്കുന്ന യുവതിയുടെ മൃതദേഹമാണ് കണ്ടെത്തിയത്. ആളെ തിരിച്ചറിഞ്ഞിട്ടില്ല. രാവിലെ ട്രെയിനില് നിന്നും വീണതാണെന്നാണ് സംശയമെന്ന് റെയില്വേ അധികൃതരും പോലീസും അറിയിച്ചു.
ആലുവയ്ക്കടുത്ത് തായിക്കാട്ടുകര മാന്ത്രയ്ക്കല് റെയില്വേ ലൈനില് 53 വയസ് തോന്നിക്കുന്ന പുരുഷന്റെ മൃതദേഹവും കണ്ടെത്തി. ട്രെയിനിടിച്ച നിലയിലാണ് മൃതദേഹം. സമീപത്ത് മണ്ണംതുരുത്ത് സ്വദേശി സാബു എന്ന പേരിലുള്ള ലൈസന്സ് കണ്ടെടുത്തിട്ടുണ്ട്. സംഭവത്തില് പോലീസ് അന്വേഷണം തുടങ്ങി.