കോട്ടയം: ഏഷ്യാനെറ്റിൽ സംപ്രേക്ഷണം ചെയുന്ന റിയാലിറ്റി ഷോ ബിഗ് ബോസ് മലയാളത്തിനെതിരെ ഗുരുതര ആരോപണവുമായി സീസൺ 5 ജേതാവ് സംവിധായകൻ അഖിൽ മാരാർ. 50 ദിവസം പിന്നിട്ട സീസൺ 6 ൽ നിന്ന് സിബിൻ എന്ന മത്സരാർഥി പുറത്തുപോയതുമായി ബന്ധപ്പെട്ടാണ് അഖിൽ മാരാർ സാമൂഹ്യ മാധ്യമങ്ങളിലൂടെ പ്രതികരണവുമായി രംഗത്തു വന്നത്.
സിബിനെ പുറത്തു പോകുന്ന നിലയിലേക്ക് കാര്യങ്ങൾ എത്തിച്ചത് ഏഷ്യാനെറ്റിലെ രണ്ട് ഉന്നതർ നടത്തിയ നീക്കങ്ങളുടെ ഫലമാണ്. സിബിന് പ്രേക്ഷകരിൽ നിന്ന് കൂടുതൽ പിന്തുണ ലഭിക്കുന്നു എന്ന് മനസിലാക്കിയ ഇവർ ഗുരുതര കുറ്റകൃത്യങ്ങളാണ് സിബിനു നേരെ നടത്തിയത്. യാതൊരു ആരോഗ്യ - മാനസിക പ്രശ്നങ്ങളും ഇല്ലാത്ത സിബിന് ഡിപ്രഷൻ, ബൈപോളാർ ഡിസീസ് എന്നിവയ്ക്കു നൽകുന്ന മരുന്ന് നൽകിയെന്നാണ് അഖിലിന്റെ ആരോപണം.
സിബിനെ ഒരു മാനസിക രോഗിയായി ചിത്രീകരിക്കാനും ഉന്നതരുടെ ഭാഗത്തുന്നിന്ന് നടപടി ഉണ്ടായി. ഇതിൻ്റെ ഭാഗമായാണ് സിബിൻ പുറത്തേക്കു പോകുന്നതും. പുറത്ത് എത്തിയിട്ടും സിബിനെ പല കാര്യങ്ങളും പുറത്ത് പറയുന്നതിൽ നിന്ന് വിലക്കി. ഏഷ്യാനറ്റുമായി ഉണ്ടാക്കിയ കരാർ ഉപയോഗിച്ച് നിയമ നടപടികൾ നേരിടേണ്ടി വരുമെന്നടക്കമുള്ള ഭീഷണി നേരിടുന്നുമുണ്ട്. തനിക്കെതിരെയും ഇത്തരം ഭീഷണി ഉണ്ടായിട്ടുണ്ടെന്നും അഖിൽ ആരോപിച്ചു.
താൻ സീസൺ 5 വിജയ് ആകാതിരിക്കാൻ ഇവർ പ്രവർത്തിച്ചു. പ്രേക്ഷകരുടെ പിന്തുണ കൊണ്ട് മാത്രമാണ് അവസാന നിമിഷം താൻ ജയിക്കുന്നത്. ഒന്നാം സീസൺ മുതൽ ഈ ഗൂഡ സംഘം പ്രവർത്തിക്കുന്നുണ്ട്. ഒടുവിൽ ഇവരുടെ ഇടപെടലുകളിൽ മനം മടുത്ത് സീസൺ ഒന്നു മുതൽ അഞ്ചുവരെ ഡയറക്ടറായിരുന്ന അർജുൻ ഇറങ്ങിപ്പോയി. കഴിഞ്ഞ സീസണിൽ ക്രീയേറ്റീവ് ഡയറക്ടറായിരുന്ന റുബീനയെ ഇവരുടെ താൽപ്പര്യം അനുസരിച്ച് പ്രവർത്തിക്കാത്തതിന് മാറ്റി നിർത്തി.
പല സ്ത്രീ മത്സരാർഥികളെയും ഉയർന്ന പ്രതിഫലം നൽകിയാണ് ഇവർ ഷോയിലേക്ക് തെരഞ്ഞെടുക്കുന്നത്. ഒപ്പം ഇവരിൽ നിന്നു ഇതിനു പ്രതിഫലമായി ഒരു ഷെയർ ഇവർ വാങ്ങുകയും ചെയ്യും. താൻ മത്സരിച്ചപ്പോൾ തനിക്ക് ലഭിച്ചതിൻ്റെ മൂന്നിരട്ടി തുക പ്രതിഫലം ലഭിച്ചവരും ഉണ്ടായിരുന്നു.
ഇത്തരം മത്സരാർഥികളെ സ്വാർഥ താൽപര്യങ്ങൾക്ക് ഉപയോഗിക്കുന്നതടക്കം ബിഗ് ബോസിൽ നടക്കുന്നുണ്ട്. പുറത്തു പറയുന്നവരെ കോൺട്രാക്ട് കാട്ടി ഭീഷണിപ്പെടുത്തും. ഇതെല്ലാം പൊതുജനം അറിയണമെന്നുള്ളതുകൊണ്ടാണ് താൻ ഇത് പറയുന്നതെന്നും എന്ത് നിയമ നടപടിയും നേരിടാൻ തയ്യാറാണെന്നും അഖിൽ സാമൂഹ്യ മാധ്യമങ്ങളിൽ പങ്കുവെച്ച വീഡിയോയിൽ പറയുന്നു.