കണ്ണൂർ: മദ്യലഹരിയിൽ വനിതാ എസ്ഐയെ ആക്രമിച്ച യുവതി അറസ്റ്റിൽ. തലശേരി കൂളി ബസാർ സ്വദേശിനി റസീന ആണ് അറസ്റ്റിലായത്. നടുറോഡിൽ ഇവർ നാട്ടുകാരെയും ആക്രമിച്ചിരുന്നു .
ഇന്ന് വൈകിട്ട് തലശേരി കിഴവന്തിമുക്കിൽ മദ്യലഹരിയിൽ സുഹൃത്തിനൊപ്പമെത്തിയ റസീന, നാട്ടുകാരുമായി വാക്കുതർക്കമുണ്ടായി. തുടർന്ന് ഇവർ നാട്ടുകാരെ മർദിച്ചു.
തൊട്ടുപിന്നാലെ തലശേരി വനിതാ എസ്ഐ ഇവിടെയെത്തി. തുടർന്ന് യുവതിയെ പോലീസ് കസ്റ്റഡിയിലെടുത്തു. വൈദ്യപരിശോധനയ്ക്കായി പോലീസ് വാഹനത്തിൽ ആശുപത്രയിൽ കൊണ്ടുപോകുന്നതിനിടെ എസ്ഐയെ ഇവർ ആക്രമിക്കുകയായിരുന്നു.
ഈ സംഭവത്തിലാണ് റസീനയ്ക്കെതിരെ ഇപ്പോൾ കേസെടുത്തത്. കൃത്യനിർവഹണം തടസപ്പെടുത്തിയതിനും എസ്ഐയെ ആക്രമിച്ചതിനുമാണ് കേസ്. കോടതിയിൽ ഹാജരാക്കിയ റസീനയെ 14 ദിവസത്തേക്ക് റിമാൻഡ് ചെയ്തു. യുവതിക്കെതിരെ തലശേരിയിലും മാഹിയിലും കേസുണ്ട്.