പുഴയിൽ കാൽ കഴുകാൻ ഇറങ്ങിയ രണ്ട് യുവാക്കൾ വഴുതിവീണ് മുങ്ങി മരിച്ചു

ഇടുക്കി : ക്രിസ്മസ് ദിനത്തിൽ തൊടുപുഴയിൽ രണ്ട് യുവാക്കൾ പുഴയിൽ മുങ്ങി മരിച്ചു. കാൽ കഴുകാനായി ഇറങ്ങിയ യുവാക്കൾ വഴുതി പുഴയിലേക്ക് വീഴുകയായിരുന്നു. ഇന്ന് ഉച്ചയ്ക്ക് ശേഷം തൊടുപുഴ തൊമ്മൻകുത്ത് പുഴയിലാണ് അപകടമുണ്ടായത്.

വാഴക്കാല സ്വദേശി മോബിസ് ഐസക്, ചീങ്കൽസിറ്റി സ്വദേശി ബ്ലസൻ എന്നിവരാണ് മരിച്ചത്. പുഴയിൽ വീണ ഇരുവരെയും വൈകാതെ തന്നെ കരയ്ക്ക് എത്തിച്ച് ആശുപത്രിയിൽ കൊണ്ടുപോയെങ്കിലും ജീവൻ രക്ഷിക്കാനായില്ല. ക്രിസ്മസ് അവധിയായതിനാൽ തൊമ്മൻകുത്ത് വെള്ളച്ചാട്ടം കാണാനായി എത്തിയതായിരുന്നു മരണപ്പെട്ട രണ്ട് യുവാക്കളും.

ഏതാനും ബന്ധുക്കളോടൊപ്പം ആണ് യുവാക്കൾ വെള്ളച്ചാട്ടം കാണാനായി എത്തിയിരുന്നത്. ജലനിരപ്പ് കൂടുതൽ ആയതിനാൽ വെള്ളച്ചാട്ടത്തിലേക്ക് ഇറങ്ങാൻ ലൈഫ് ഗാർഡ് ഇവരെ അനുവദിച്ചിരുന്നില്ല. തുടർന്ന് തിരികെ മടങ്ങുന്ന വഴി തൊമ്മൻകുത്ത് പുഴയിൽ കാൽ കഴുകാനായി ഇറങ്ങിയപ്പോൾ ആയിരുന്നു അപകടമുണ്ടായത്. യുവാക്കളുടെ കൂടെയുണ്ടായിരുന്ന ബന്ധുക്കളും നാട്ടുകാരും ചേർന്ന് രക്ഷാപ്രവർത്തനം നടത്തിയെങ്കിലും മരണം സംഭവിക്കുകയായിരുന്നു.