തിരുവനന്തപുരം: റംസാന് കാലത്ത് ചില മോസ്കുകളില് ആള്ക്കൂട്ടമുണ്ടാകുന്നതായി റിപ്പോര്ട്ടുണ്ടെന്നും അതൊഴിവാക്കാനുള്ള നടപടി സ്വീകരിക്കണമെന്നും മുഖ്യമന്ത്രി പിണറായി വിജയന്റെ നിര്ദേശം.
റംസാന് കാലമാണെങ്കിലും മോസ്കുകളില് കൂട്ട പ്രാര്ത്ഥനയോ ആളുകള് കൂടുന്ന ചടങ്ങോ ഉണ്ടാകില്ലെന്ന് എല്ലാ മതസംഘടനകളും മതനേതാക്കളും ഉറപ്പുനല്കിയിട്ടുണ്ടെന്നും ഭൂരിഭാഗം ഇടങ്ങളിലും അതു നടപ്പായിട്ടുണ്ടെന്നും മുഖ്യമന്ത്രി ചൂണ്ടിക്കാട്ടി.
ഇസ്ലാം മതവിശ്വാസികള് പുണ്യമാസമായി കണക്കാക്കുന്ന റംസാന് മാസത്തില് മോസ്കുകളില് നടന്നുവരുന്ന നോന്പുതുറ, ജുംആ നമസ്കാരം, തറാവീഹ് നമസ്കാരം, അഞ്ചുനേരത്തെ ജമാഅത്ത് നമസ്കാരം തുടങ്ങിയ കര്മങ്ങള് മോസ്കുകളില് വേണ്ടെന്നു വയ്ക്കുകയാണെന്ന് മുഖ്യമന്ത്രി പിണറായി വിജയന് കഴിഞ്ഞ ദിവസം അറിയിച്ചിരുന്നു.
ഇസ്ലാം മത പണ്ഡിതരുമായി വീഡിയോ കോണ്ഫറന്സിലൂടെ മുഖ്യമന്ത്രി പിണറായി വിജയന് നടത്തിയ കൂടിക്കാഴ്ചയ്ക്കു ശേഷമാണ് ഇങ്ങനെയൊരു തീരുമാനത്തിലെത്തിയത്. കോവിഡ് നിയന്ത്രിക്കുന്നതിന് സര്ക്കാര് നല്കുന്ന നിര്ദ്ദേശങ്ങള് പൂര്ണമായും പാലിക്കുമെന്ന് വീഡിയോ കോണ്ഫറന്സില് പങ്കെടുത്ത മത പണ്ഡിതര് സര്ക്കാരിന് ഉറപ്പുനല്കി.