തിരുവനന്തപുരം: തമിഴ്നാട്ടിലെ ടിടിവി ദിനകരന്റെ പാര്ട്ടിയായ അമ്മ മക്കള് മുന്നേറ്റ കഴകത്തില് ചേരാന് സരിത എസ് നായര്ക്ക് ക്ഷണം. കഴിഞ്ഞ ദിവസം പ്രവര്ത്തകര് വീട്ടില് വന്ന് പാര്ട്ടിയിലേക്ക് ക്ഷണിക്കുകയായിരുന്നു എന്ന് സരിത എസ് നായര് പറഞ്ഞു. എന്നാല് താന് ഇക്കാര്യത്തില് ഇതുവരെ തീരുമാനമെടുത്തിട്ടില്ല. ഇതേക്കുറിച്ച് ആലോചനയിലാണെന്നും സരിത ഈ വാർത്തയെ കുറിച്ച് വ്യക്തമാക്കിയിട്ടുണ്ട്.
പാർട്ടിയുടെ നേതാക്കളായ കെ.ടി. പച്ചമാല്, ഉദയന്, മറ്റ് പ്രവര്ത്തകരും ചേര്ന്നാണ് ക്ഷണിക്കാന് എത്തിയത്. പാര്ട്ടിയില് ചേരാനുള്ള ക്ഷണം മാത്രമായിരുന്നുവെന്നും മറ്റ് വാഗ്ദാനങ്ങളൊന്നും തനിക്ക് തന്നിട്ടില്ലെന്നും സരിത പറഞ്ഞു. ഉദയനെ വര്ഷങ്ങളായി തനിക്ക് അറിയാം. ഇങ്ങനെയൊരു ക്ഷണം വരാനുള്ള കാരണം അറിയില്ല-സരിത പറഞ്ഞു.
വ്യക്തിപരമായ ചില ബുദ്ധിമുട്ടുകള് കാരണം തുടര്ചര്ച്ച നടത്തിയിട്ടില്ല. തമിഴ്നാടിന്റെ രാഷ്ട്രീയത്തെക്കുറിച്ച് അറിയില്ല. തനിക്ക് രാഷ്ട്രീയവുമില്ല. ഇതിനെക്കുറിച്ച് എന്തൊക്കെ വാര്ത്തകളാണ് പ്രചരിക്കുന്നതെന്ന് അറിയില്ല. ഒരുപാട് ആലോചിച്ച് തീരുമാനമെടുക്കേണ്ട വിഷയമാണ്. പെട്ടെന്ന് ഒരു എടുത്തുചാട്ടത്തിനില്ലെന്നും സരിത പറഞ്ഞു.