തൃശൂര്: ഇരിങ്ങാലക്കുട കാറളത്ത് എഴുന്നള്ളത്തിനിടെ ഇടഞ്ഞ ആന പാപ്പാനെ കുത്തിക്കൊന്നു. പാലക്കാട് ശ്രീകൃഷ്ണപുരം സ്വദേശി നന്ദന് (40) ആണ് മരിച്ചത്. ഗുരുവായൂര് ദേവസ്വത്തിന്റെ ശ്രീകൃഷ്ണന് എന്ന ആനയാണ് ഇടഞ്ഞത്.
ചൊവ്വാഴ്ച കാറളം കുഞ്ഞാലക്കാട്ടില് ക്ഷേത്രത്തിലാണ് സംഭവം. ഉത്സവത്തിനായി എത്തിച്ച ആന എഴുന്നള്ളത്തിനിടെ ഇടയുകയായിരുന്നു.
ഈ സമയം ആനയ്ക്കൊപ്പം നടക്കുകയായിരുന്ന പാപ്പാന് നന്ദന് ആനയുടെ കാലുകള്ക്കിടയില് കുടുങ്ങിപ്പോയി. ക്ഷേത്രപരിസരത്ത് നിന്നും പ്രദേശത്തുള്ള വാഴത്തോപ്പിലേക്ക് ഓടിക്കറിയ ആന വാഴകൃഷി മുഴുവനായും നശിപ്പിച്ചു. പിന്നീട് നാട്ടുകാര് വിവരമറിയിച്ചതിനെ തുടര്ന്ന് സ്ഥലത്ത് എത്തിയ വനംവകുപ്പ് ഉദ്യോഗസ്ഥര് മയക്കുവെടിവച്ചാണ് ആനയെ തളച്ചത്.