ദാവോസ്: കാഷ്മീര് വിഷയത്തില് ഇടപെടാമെന്ന് ആവര്ത്തിച്ച് അമേരിക്കന് പ്രസിഡന്റ് ഡോണള്ഡ് ട്രംപ്. പാക് പ്രധാനമന്ത്രി ഇമ്രാന് ഖാനെ സമീപമിരുത്തിയാണ് ട്രംപ് തന്റെ കാഷ്മീര് മോഹം പങ്കുവച്ചത്. ജമ്മുകാഷ്മീരിന്റെ പ്രത്യേക പദവി കേന്ദ്രസര്ക്കാര് എടുത്തുകളഞ്ഞതിനു ശേഷം ഇത് നാലാം വട്ടമാണ് ട്രംപ് കാഷ്മീര് "ഓഫര്' മുന്നോട്ടുവയ്ക്കുന്നത്.
സ്വിസ് റിസോര്ട്ട് നഗരമായ ദാവോസില് ലോകസാമ്ബത്തിക ഫോറം സമ്മേളനത്തിനു മുന്നോടിയായി ട്രംപും ഖാനും മാധ്യമങ്ങളെ കണ്ടപ്പോഴാണ് ഇക്കാര്യം പറഞ്ഞത്. തങ്ങള് കാഷ്മീരിനെക്കുറിച്ചും ഇന്ത്യയും പാക്കിസ്ഥാനും തമ്മിലുള്ള ബന്ധത്തെ സംബന്ധിച്ചും സംസാരിച്ചതായി ട്രംപ് പറഞ്ഞു. കാഷ്മീര് വിഷയത്തില് തങ്ങള്ക്ക് സഹായിക്കാന് കഴിയുമെങ്കില് തീര്ച്ചയായും സഹായിക്കും. തങ്ങള് ഇത് നിരീക്ഷിച്ചുവരികയാണ്, വളരെ അടുത്ത് പിന്തുടരുകയും ചെയ്യുന്നു- ട്രംപ് കൂട്ടിച്ചേര്ത്തു.
അഫ്ഗാനിസ്ഥാന്പോലെ തങ്ങള് സംസാരിക്കാന് ആഗ്രഹിക്കുന്ന വിഷയങ്ങളുണ്ടെന്ന് ഇമ്രാന് ഖാന് പറഞ്ഞു. ഇന്ത്യ, ഒരു വലിയ പ്രശ്നം തന്നെയാണ്. മറ്റൊരു രാജ്യത്തിനും സാധ്യമല്ലാത്തതിനാല് ഇന്ത്യയുമായുള്ള പ്രശ്നങ്ങള് പരിഹരിക്കുന്നതില് അമേരിക്ക അതിന്റെ പങ്ക് വഹിക്കുമെന്നാണ് പ്രതീക്ഷിക്കുന്നതെന്നും ഇമ്രാന് ഖാന് പറഞ്ഞു.