പൂത്തുലഞ്ഞു നിൽക്കുന്ന വർണ്ണാഭമായ  ട്യൂലിപ് ഗാർഡൻ; നിരവധിയനവധി നവദമ്പതികളുടെ മധുവിധുക്കാലം സമ്മാനിച്ച  മറക്കാനാകാത്ത മധുരസ്മരണകൾ ഇവിടെ നിശബ്ദമായുറങ്ങുന്നു !

ദൂർ തക് നിഗാഹ്‌ മേം ഹെ ഗുൽ ഖിലേ ഹുവേ .....................!

മനോഹരമായി പൂത്തുലഞ്ഞു നിൽക്കുന്ന വർണ്ണാഭമായ ട്യൂലിപ് ( TULIP ) ചെടികൾ. സഞ്ചാരികളുടെ മനം മയക്കുന്ന ഈ മാസ്മരികലോകം കാണാനെത്തിയിരുന്നത് ഒരു വർഷം രണ്ടരലക്ഷം ആൾക്കാരായിരുന്നു.

പ്രണയജോഡികളുടെ പറുദീസയായിരുന്നു ഈ ട്യൂലിപ് ഗാർഡൻ. നിരവധിയനവധി നവദമ്പതികളുടെ മധുവിധുക്കാലം സമ്മാനിച്ച മറക്കാനാകാത്ത മധുരസ്മരണകൾ ഇവിടെ നിശബ്ദമായുറങ്ങുന്നു. കഴിഞ്ഞ കാലങ്ങളുടെ ഓർമ്മകളയവിറക്കി മഞ്ഞുപൊഴിയുന്ന കാശ്മീർ താഴ്വരയിൽ വസന്തത്തിന്റെ വരവറിയിച്ച് ഇത്തവണയും പൂക്കാലം വന്നെത്തി.

ശ്രീനഗറിലെ 30 ഹെക്ടറിൽ പരന്നുകിടക്കുന്ന ഏഷ്യയിലെ ഏറ്റവും വലുതും ലോകത്തെ അഞ്ചാമത്തേ തുമായ ഇന്ദിരാഗാന്ധി മെമ്മോറിയൽ ട്യൂലിപ് ഗാർഡനിൽ ഇപ്പോൾ 55 ഇനങ്ങളിലായി 13 ലക്ഷം ട്യൂലിപ് പൂക്കളാണ് വിടർന്നു നിൽക്കുന്നത്. കണ്ണിനു കുളിർമ്മയേകുന്ന വർണ്ണാഭമായ ആ കാഴ്ച കാണാൻ ഇക്കൊല്ലം സഞ്ചാരികൾക്കു ഭാഗ്യമുണ്ടാകില്ല.

കാശ്മീരിൽ കൊറോണാ വൈറസ് ബാധിതർ 168 പേരാണ്.ഇതുവരെ മരണം രേഖപ്പെടുത്തിയത് 3 പേർ. ലോക്ക് ഡൗൺ കാലാവധി കാശ്മീരിലും നീട്ടുകയാണ്. ട്യൂലിപ്പ് ഗാർഡനിൽ സഞ്ചാരികൾക്ക് 50 രൂപയാ യിരുന്നു പ്രവേശനടിക്കറ്റ്. 100 തൊഴിലാളികളാണ് ഇവിടെ പൂന്തോട്ട പരിചരണത്തിനുള്ളത്.

കാശ്മീരിൽ ഇതുപോലെയുള്ള 308 വിവിധയിനം പൂക്കളുടെ ഗാർഡനുകളുണ്ട്. കാശ്മീരിലെ 10 ദിവസത്തെ ട്യൂലിപ്പ് ഫെസ്റ്റിവൽ പ്രസിദ്ധമായിരുന്നു. പരമ്പരാഗത കാശ്മീർ നൃത്തകലാസംഗീത സമാഗമം അവിടെ ഒരുക്കിയിരുന്നു. എന്നാൽ ഇക്കൊല്ലം അതൊന്നുമുണ്ടാകില്ല. 2007 ൽ ആരംഭിച്ച ഈ ഗാർഡനിൽ 13 വർഷത്തിനുശേഷം ഇതാദ്യമായാണ് സഞ്ചാരികളില്ലാത്ത ഒരു പൂക്കാലം കടന്നുപോകുന്നത്.

ഹോളണ്ടിലെ Keukenhof ട്യൂലിപ്പ് ഗാർഡനാണ് ലോകത്ത് ഏറ്റവും പ്രസിദ്ധം.70 ലക്ഷം ചെടികളാണ് ഇവിടെ ഒരു വർഷം പൂവിടുന്നത്.അതിൽ ട്യൂലിപ്പ്,ഡഫോഡിൽസ് ,ലില്ലി,റോസാപ്പൂ എന്നിവയുമുണ്ട്. അമെരിക്ക, കാനഡ,ആസ്‌ത്രേലിയ എന്നിവിടെയാണ് രണ്ടുമുതൽ നാലുവരെ സ്ഥാനങ്ങളിലുള്ള ട്യൂലിപ്പ് ഗാർഡനുകൾ ഉള്ളത്.

ഹോളണ്ടിലെ Keukenhof ട്യൂലിപ്പ് ഗാർഡനിലാണ് 1981 ൽ പുറത്തിറങ്ങിയ അമിതാബ് ബച്ചൻ,രേഖ,ജയഭാദുരി, സഞ്ജീവ് കുമാർ എന്നിവരഭിനയിച്ച 'സിൽസില' എന്ന ബ്ലോക്ക് ബസ്റ്റർ ചിത്രത്തിലെ....

" ദേഖ ഏക് ക്വാബ് തോ യെ സിൽസിലേ ഹുവേ , ദൂർ തക് നിഗാഹ് മേം ഹെ ഗുൽ ഖിലേ ഹുവേ' എന്ന ഗാനത്തിന്റെ ചിത്രീകരണം നടന്നത്. ആ പാട്ടിലെ രണ്ടാമത്തെ വരിയാണ് ഈ പോസ്റ്റിന്റെ ശീർഷകമായി ഞാനെടുത്തത്.

ദേഖ ഏക് ക്വാബ് തോ യെ സിൽസിലേ ഹുവേ ( തുടരെത്തുടരെ ഒരു സ്വപ്‍നം കാണപ്പെടുന്നു),

ദൂർ തക് നിഗാഹ് മേം ഹെ ഗുൽ ഖിലേ ഹുവേ' ( കണ്ണെത്തും ദൂരം വരെ പൂക്കൾവിടർന്നുനിൽക്കുന്നു)..