'കാല് കാണിക്കാനാണെങ്കില്‍ എന്തിനാണ് സാരി ഉടുക്കുന്നത്. ബര്‍മുഡ ധരിച്ചാല്‍ പോരെ '; മമത ബാനര്‍ജിക്കെതിരെ പശ്ചിമ ബംഗാള്‍ ബിജെപി അധ്യക്ഷന്‍ നടത്തിയ പരാമര്‍ശത്തിനെതിരെ വ്യാപക പ്രതിഷേധം

കൊല്‍ക്കത്ത: പശ്ചിമ ബംഗാള്‍ മുഖ്യമന്ത്രി മമത ബാനര്‍ജിക്കെതിരായ ബി.ജെ.പി സംസ്ഥാന അധ്യക്ഷന്‍ ദിലീപ് ഘോഷിന്റെ പരാമര്‍ശത്തിനെതിരെ വ്യാപക പ്രതിഷേധം. തിരഞ്ഞെടുപ്പ് റാലിക്കിടെയാണ് ദിലീപ് ഘോഷ് വിവാദ പ്രസ്താവന നടത്തിയത്.

'ഇപ്പോള്‍ പ്ലാസ്റ്റര്‍ മാറ്റി ബാന്‍ഡേജ് കെട്ടിയിരിക്കയാണ്. ഇപ്പോള്‍ കാലുകളാണ് അവര്‍ ആളുകളെ കാണിക്കുന്നത്. ഒരു കാല് കാണിച്ചും ഒരെണ്ണം കാണിക്കാതെയുമാണ് അവര്‍ സാരിയുടുക്കുന്നത്. ഇങ്ങനെ ഒരാള്‍ സാരി ധരിക്കുന്നത് ഞാന്‍ ഇതുവരെ കണ്ടിട്ടില്ല. കാല് കാണിക്കാനാണെങ്കില്‍ എന്തിനാണ് സാരി ഉടുക്കുന്നത്. ബര്‍മുഡ ധരിച്ചാല്‍ പോരെ. എന്നാല്‍ എല്ലാവര്‍ക്കും വ്യക്തമായി കാണാമല്ലോ', ദിലീപ് ഘോഷിന്റെ ഈ പരാമര്‍ശമാണ് വിവാദമായത്.