കൊച്ചി: ചാലക്കുടി ലോക്സഭാ സീറ്റില് ഇന്നസെന്റ് എം പിയ്ക്ക് രണ്ടാമൂഴം നിഷേധിച്ചതോടെ ഇവിടെ പി രാജീവിനൊപ്പം മുന് എം എല് എ സാജു പോളിനെയും സി പി എം പരിഗണിക്കുന്നു. രാജീവിനെ എറണാകുളത്തേക്ക് പരിഗണിച്ചാല് സാജു പോളിനെ ചാലക്കുടിയില് മത്സരിപ്പിക്കാനാണ് സി പി എമ്മിന്റെ ആലോചന.
യു ഡി എഫിന്റെ സ്ഥാനാര്ഥി ആരെന്നതിനെ ആശ്രയിച്ചാകും ചാലക്കുടിയില് പി രാജീവിന്റെ കാര്യത്തില് അന്തിമ തീരുമാനം ഉണ്ടാകുക. എന്നാല് സി പി എം ചാലക്കുടിയില് സാജു പോളിന്റെ പേര് മുന്നോട്ട് വച്ചാല് ചാലക്കുടിയിലോ ത്രുശൂരിലോ ഡീന് കുര്യാക്കോസ് യു ഡി എഫ് സ്ഥാനാര്ഥിയാകും.
ചാലക്കുടിയില് പി രാജീവാണ് സി പി എം സ്ഥാനാര്ഥിയെങ്കില് യു ഡി എഫ് മുന് മന്ത്രി കെ ബാബുവിനെ ഇവിടെ പരിഗണിച്ചേക്കും. യു ഡി എഫ് കണ്വീനര് ബെന്നി ബെഹന്നാനും ചാലക്കുടിയില് സീറ്റ് മോഹികളുടെ കൂട്ടത്തില് പ്രധാനിയാണ്. പക്ഷേ മുന്നണി ഭാരവാഹിത്വത്തില് നിയമിക്കപ്പെട്ടതിനാല് ബെന്നിയുടെ ആവശ്യം പരിഗണിച്ചേക്കില്ല.
ചാലക്കുടിയിലേക്ക് നേതൃത്വം പരിഗണിക്കുന്ന പേരില് ഒന്നാം പരിഗണനയിലുള്ളത് കെ പി സി സി മുന് പ്രസിഡന്റ് വി എം സുധീരനാണെന്നും റിപ്പോര്ട്ടുണ്ട്. സുധീരന് മത്സരത്തിന് സമ്മതം മൂളിയാല് ആദ്യ പരിഗണന അദ്ദേഹത്തിന് തന്നെ ആയിരിക്കും. അങ്ങനെ വന്നാല് തൃശൂരില് യൂത്ത് കോണ്ഗ്രസ് അധ്യക്ഷന് ഡീന് കുര്യാക്കോസ് പരിഗണിക്കപ്പെടുമെന്നുറപ്പാണ്.
എന്തായാലും ചാലക്കുടിയിലെ സീറ്റ് നിര്ണ്ണയം ഇത്തവണ ഇരുമുന്നണികള്ക്കും നിര്ണ്ണായകമാണ്.