ആദ്യം പ്രസംഗിച്ചത് റബ്ബർ മരങ്ങളോട് ,'' .....കൊച്ചാപ്പൻ പറഞ്ഞു കുട്ടിയമ്മയെ കെട്ടി......കേരളാ കോൺഗ്രസ്സ് പിളർന്നിട്ടില്ല ...... ആത്മകഥയിൽ മനസ്സു തുറന്ന് പ്രിയപ്പെട്ട മാണിസാർ

കെ.എം. മാണി ആത്മകഥ എഴുതിയിരുന്നുവെന്ന വിവരം മകന്‍ ജോസ് കെ. മാണി എം.പിയും മരുമകള്‍ നിഷയും ആദ്യമായാണ് ഇപ്പോള്‍ വെളിപ്പെടുത്തുന്നത്.

''പഴങ്കഞ്ഞി കുടിച്ചും ബസ്സില്‍ നിന്ന് 'ഉറങ്ങി 'യുമൊക്കെയാണ് ഞാന്‍ പൊതുജീവിതത്തില്‍ സജീവമായത്. മരങ്ങാട്ടുപള്ളിയില്‍ നിന്ന് 5 കിലോമീറ്റര്‍ അകലെയുള്ള പാലായിലേക്ക് സ്വകാര്യബസ്സിലാണ് യാത്ര.

''കൊച്ചാപ്പന്‍ (മാണിയുടെ അച്ഛന്‍) കുട്ടിയമ്മയെ എനിക്കുവേണ്ടി പെണ്ണുകാണാന്‍ പോയി. ബന്ധുവായിരുന്ന ഒരു കൈക്കുഞ്ഞിനെയുമെടുത്താണ് കുട്ടിയമ്മ കൊച്ചാപ്പന്റെ മുന്നില്‍ വന്നത്. തിരികെ വീട്ടിലെത്തിയപ്പോഴെ കൊച്ചാപ്പന്‍ പറഞ്ഞു; എടാ അവളെ വീട്ടില്‍ നിര്‍ത്താന്‍ കൊള്ളാവുന്ന പെണ്‍കൊച്ചാണ്. നമുക്ക് ഈ കല്യാണം നടത്താം''... പിന്നീട് തന്റെ പ്രിയപ്പെട്ട ഭാര്യയായി കുട്ടിയമ്മ കരിങ്ങോഴയ്ക്കല്‍ വീട്ടിലേക്ക് വന്നതിനെപ്പറ്റി എഴുതുകയാണ് മാണി.കൈയേറ്റഭൂമിയാണെന്ന് ആരോപിച്ച് ആലപ്പുഴയില്‍ സി.പി.എം. കര്‍ഷരുടെ ഫലവൃക്ഷങ്ങള്‍ വെട്ടിക്കളയുന്നത് അറിഞ്ഞ് മാണി അവിടെച്ചെന്നു. സി.പി.എമ്മിന്റെ ശക്തികേന്ദ്രമായ ഒരു ഭാഗത്ത് അവര്‍ വെട്ടിക്കളഞ്ഞ തെങ്ങുകള്‍ക്കു പകരം പുതിയ തെങ്ങിന്‍ത്തൈകള്‍ കുഴിപ്പിച്ച് വച്ച് മടങ്ങിയ കഥയും കോണ്‍ഗ്രസില്‍ നിന്ന് പി.റ്റി. ചാക്കോ ഗ്രൂപ്പുണ്ടാക്കി പുറത്തുവന്ന കാര്യവുമൊക്കെ ആത്മകഥയില്‍ വിവരിക്കുന്നുണ്ട്.

'വളരുന്തോറും പിളരുകയും പിളരുന്തോറും വളരുകയും ചെയ്യുന്ന " പ്രസ്ഥാനമാണ് കേരളാകോണ്‍ഗ്രസ് ' എന്ന പ്രസിദ്ധമായ വാചകം മാണി പറഞ്ഞിട്ടുണ്ടെങ്കിലും പാര്‍ട്ടിയില്‍ നിന്ന് പലരും വിട്ടുപോയത് പിളര്‍പ്പേയല്ല എന്നാണ് ആത്മകഥയില്‍ മാണി പറയുന്നത്. ചില ആളുകള്‍ പാര്‍ട്ടിയില്‍ നിന്ന് പോയി. അവര്‍ പിന്നീട് തിരികെ വന്നു എന്ന നിലപാടാണ് ആത്മകഥയില്‍ മാണി സ്വീകരിച്ചിട്ടുള്ളത്.''ആരോടും ഒരിക്കലും ശത്രുത വച്ചുപുലര്‍ത്തരുത് ''എന്ന തത്വം ജീവിതത്തിലും പ്രവര്‍ത്തിയിലും കാത്തുസൂക്ഷിച്ച കെ.എം. മാണി ബോധപൂര്‍വ്വം തന്നെ ആത്മകഥയിലും ആരെയും ഒരിടത്തും കുറ്റപ്പെടുത്തുന്നില്ല എന്നുള്ളതും ശ്രദ്ധേയം.

രണ്ട് പ്രമുഖ അദ്ധ്യാപകര്‍ക്ക് പറഞ്ഞുകൊടുത്ത് എഴുതിച്ച ആത്മകഥ പലവട്ടം വായിച്ചു നോക്കി മാണി തെറ്റുകള്‍ തിരുത്തിയിരുന്നു. ''എത്രയും വേഗം അച്ചാച്ചന്റെ ആത്മകഥ പുസ്തമാക്കണം എന്നുണ്ട്. അതിനുള്ള തയ്യാറെടുപ്പുകള്‍ തുടങ്ങിക്കഴിഞ്ഞു.'' ജോസ് കെ. മാണിയും നിഷയുംട് പറഞ്ഞു.