വരണ്ട ചർമം ഏറെ പരിചരണം നൽകേണ്ട ഒന്നാണ്. അതുപോലെ തന്നെ അനുയോജ്യമായവ തിരഞ്ഞെടുത്ത് ഉപയോഗിക്കുകയും വേണം. ഇതിന് ഏറ്റവും മികച്ച ഒന്നാണ് ഒലിവ് ഓയിൽ. വരണ്ട അവസ്ഥ പൂർണമായും മാറ്റി മൃദുവാക്കി മാറ്റാൻ ഒലിവ് ഓയിൽ പതിവായി ഉപയോഗിക്കുന്നത് സഹായിക്കും. ആന്റി-ഏജിംഗ്, മോയ്‌സ്ചറൈസിംഗ് ഗുണങ്ങൾ ഉള്ളതിനാൽ ചർമത്തെ എല്ലാ തരത്തിലും മനോഹരമാക്കാനും ഒലിവ് ഓയിൽ പ്രയോജനപ്പെടും.
ഒലിവ് ഓയിലിന്റെ ഗുണങ്ങൾ:
1. ചർമ്മത്തെ മോയ്സ്ചറൈസ് ചെയ്യുന്നു:
ആരോഗ്യകരമായ കൊഴുപ്പുകളാൽ സമ്പന്നമാണെന്ന് അറിയപ്പെടുന്ന ഒലിവ് ഓയിൽ ഈർപ്പം നിലനിർത്താനും ചർമ്മത്തിൽ ഒരു പാളി ഉണ്ടാക്കാനും സഹായിക്കുന്ന ഒരു മികച്ച പ്രകൃതിദത്ത മോയ്സ്ചറൈസറാണ്. ഇത് ചർമ സുഷിരങ്ങളിലെ സെബം ഉത്പാദനം നിയന്ത്രിക്കാനും ചർമ്മത്തിലെ അമിതമായ എണ്ണയെ തടയാനും സഹായിക്കുന്നു. സ്വാഭാവിക ജലാംശം ഉള്ള ഒരു ചർമ്മം നിങ്ങൾക്ക് നൽകാനും ഇത് സഹായിക്കുന്നു.
2. ആന്റി-ഏജിംഗ് ഗുണം:
വരണ്ട ചർമം വാർദ്ധക്യത്തിന്റെ ആദ്യ ലക്ഷണമാണ്. എന്നാൽ വരണ്ട ചർമം ഉള്ളവരിൽ ഇത് വാർദ്ധക്യം അടുക്കുന്നതിനും എത്രയോ മുൻപ് ചർമം വലിയ തോതിൽ വരണ്ടതും ചുളിവുകൾ വീഴുന്നതുമായി കാണിക്കും. ഇത് കൈകാര്യം ചെയ്യുന്നതിനുള്ള മികച്ച മാർഗമാണ് ഒലിവ് ഓയിൽ. മികച്ച ആന്റി-ഏജിംഗ് പ്രോപ്പർട്ടികൾ ഇതിന് ഉണ്ട്, അതുകൊണ്ട് തന്നെ നേർത്ത വരകൾ, ചുളിവുകൾ, ആദ്യകാല വാർദ്ധക്യത്തിന്റെ മറ്റ് അടയാളങ്ങൾ എന്നിവയ്ക്കെതിരെ ഇത് പ്രവർത്തിക്കും. ഒലിവ് ഓയിൽ ആന്റിഓക്‌സിഡന്റുകൾ ധാരാളം അടങ്ങിയിട്ടുണ്ട്, ഇത് ഫ്രീ റാഡിക്കലുകളെ ചെറുക്കാൻ സഹായിക്കുന്നു.
3. ജീർണ ചർമ്മത്തെ പുറംതള്ളുന്നു:
ഒലിവ് ഓയിലിലെ ആന്റിഓക്‌സിഡന്റുകൾ ചർമ്മത്തെയും ചർമ സുഷിരങ്ങളെയും ആഴത്തിൽ ശുദ്ധീകരിക്കാൻ സഹായിക്കുന്നു. ഇത് ചർമ്മത്തിലെ എല്ലാ നിർജീവ കോശങ്ങളെയും നീക്കം ചെയ്യുകയും പുതിയതും തിളക്കമുള്ളതുമായ ചർമ്മം നൽകുകയും ചെയ്യുന്നു. മുഖക്കുരു ഉണ്ടാകാനുള്ള സാധ്യതകൾ നീക്കം ചെയ്യാനും ഒലിവ് ഓയിലിനു കഴിയും.
4. ചർമ്മത്തെ പുനരുജ്ജീവിപ്പിക്കുന്നു:
ചർമത്തിൽ മസാജ് ചെയ്യുന്നത് വളരെ പ്രധാനപ്പെട്ട ഒരു ചർമ സംരക്ഷണ മാർഗമാണ്. ഇതിനായി ഒലിവ് ഓയിൽ ഉപയോഗിച്ചാൽ ഗുണം ഇരട്ടിയാകും. മങ്ങിയതും വരണ്ടതുമായ ചർമ്മത്തെ പുനരുജ്ജീവിപ്പിക്കാൻ ഒലിവ് ഓയിൽ പതിവായി മസാജ് ചെയ്യാം. ഇത് രക്തചംക്രമണം മെച്ചപ്പെടുത്തുക മാത്രമല്ല ചർമ്മത്തിന് ആവശ്യമായ പോഷണം നൽകുകയും ചെയ്യുന്നു.
5. ചർമ്മത്തെ ശുദ്ധീകരിക്കുന്നു:
ചർമ സുഷിരങ്ങൾ നല്ല രീതിയിൽ ശുദ്ധീകരിക്കുകയും അതുവഴി സ്വപ്നതുല്യമായ തിളക്കം ചർമത്തിന് നല്കാനും കഴിയുന്നത് ഒലിവ് ഓയിലിന്റെ പ്രത്യേകതയാണ്. വിറ്റാമിൻ ഇ ധാരാളം അടങ്ങിയിരിക്കുന്നതിനാൽ തിളക്കവും മൃദുത്വവും കൂടും.
