അയോവ ജി ഓ പി കോക്കസിൽ ട്രംപിനെക്കാൾ പിന്തുണ ഡിസാന്റിസിനെന്നു സർവ്വേ 

ന്യൂയോർക്ക് : യുഎസ് ദേശീയ തിരഞ്ഞെടുപ്പുകളിൽ പോർക്കള സംസ്ഥാനങ്ങളിൽ ഒന്നാവുന്ന അയോവയിൽ റിപ്പബ്ലിക്കൻ പാർട്ടി കോക്കസ് ഡൊണാൾഡ് ട്രംപിനെ തള്ളിക്കളയുന്നു. ഫ്‌ളോറിഡ ഗവർണർ റോൺ ഡിസാന്റിസിനാണ് അവിടെ മുൻതൂക്കമെന്ന് നെയ്‌ബർഹുഡ് റിസർച്ച് ആൻഡ് മീഡിയ നടത്തിയ സർവേയിൽ കണ്ടെത്തി.

ഡിസാന്റിസിനെ (44) കോക്കസുകളിൽ പങ്കെടുക്കുന്ന 32% പേർ പ്രഥമ സ്ഥാനാർത്ഥിയായി കാണുമ്പോൾ ട്രംപിന്റെ (76) പിന്തുണ 30% ആണ്. ജൂണിൽ ട്രംപ് ഇതേ സർവേയിൽ 38% നേടിയപ്പോൾ ഡിസാന്റിസിനു ലഭിച്ചത് 17% ആയിരുന്നു. അതിനു മുൻപ് നവംബറിൽ ട്രംപിന് 56%, ഡിസാന്റിസിനു 12% എന്നായിരുന്നു നില.

ഡിസാന്റിസിന്റെ പിന്തുണ മൂന്നിരട്ടിയോളം കുതിച്ചു കയറിയെന്നു സർവ്വേ നടത്തിയ ഗ്രൂപ്പിന്റെ റിക്ക് ഷാഫ്റ്റൺ ചൂണ്ടിക്കാട്ടുന്നു. തീരുമാനം എടുക്കാത്ത 30% ഉണ്ട്. മറ്റൊരു സ്ഥാനാർഥിയും 10% കടന്നില്ല. മുൻ വൈസ് പ്രസിഡന്റ് മൈക്ക് പെൻസിന്റെ കൂടെയുള്ളത് 3% ആണ്. യുഎന്നിലെ മുൻ പ്രതിനിധി നിക്കി ഹേലി, ഗവർണർമാരായ കിം റെയ്‌നോൾഡ്‌സ് (അയോവ), ക്രിസ്റ്റി നോയം (സൗത്ത് ഡക്കോട്ട), മുൻ ഹൗസിംഗ് സെക്രട്ടറി ബെൻ കാഴ്സൺ ഇവർക്കൊക്കെ കിട്ടുന്നത് വെറും ഒരു ശതമാനം.

രണ്ടാം മുൻഗണനാ വോട്ടുകളിൽ 48% ഡിസാന്റിസ് നേടിയപ്പോൾ ട്രംപിനു 42% കിട്ടി. പെൻസിനു 6%, നോയമിന് 3%. മൂന്നാം തവണ പ്രസിഡന്റ് സ്ഥാനത്തേക്കു മത്സരിക്കുമെന്ന് നവംബർ 15നു പ്രഖ്യാപിച്ച ട്രംപിന് എതിരെ വർധിച്ചു വരുന്ന അസംതൃപ്തി സർവേയിൽ നിഴലിക്കുന്നു.

ഇടക്കാല തിരഞ്ഞെടുപ്പിനു ശേഷം മോണിംഗ് കൺസൾട്ട്/പൊളിറ്റിക്കോ സർവേയിൽ ട്രംപ് ഒരു കാരണവശാലും മത്സരിക്കരുതെന്നു തീർത്തു പറഞ്ഞ 53% ഉണ്ടായിരുന്നു. 65% പറഞ്ഞതു ട്രംപ് 'ഒരു പക്ഷെ' മത്സരിക്കാം എന്നാണ്.

അടുത്തിടെ പുറത്തു വന്ന യുവ്ഗവ് ദേശീയ പോളിംഗിൽ ഡിസാന്റിസിനു  ട്രംപിന്റെ മേൽ 7% ലീഡ് കണ്ടു. 2024 ചിന്താവിഷയമായ ശേഷം ഡിസാന്റിസ് മുന്നിലെത്തുന്ന ആദ്യത്തെ പോളിംഗ്. അദ്ദേഹം 42%, ട്രംപ് 35% എന്നതായിരുന്നു നില.