നെയ്മറെ ചികിത്സിക്കാന്‍ നാസ സാങ്കേതികവിദ്യയും!

ദോഹ: സെര്‍ബിയയ്ക്കെതിരായ ആദ്യ ലോകകപ്പ് മത്സരത്തില്‍ പരിക്കേറ്റ് ബ്രസീല്‍ സൂപ്പര്‍ താരം നെയ്മറുടെ സഹായത്തിന് യുഎസ് ബഹിരാകാശ ഏജന്‍സിയായ നാസയുടെ സാങ്കേതികവിദ്യയും പ്രയോഗിക്കും.

കണങ്കാലിന് പരിക്കേറ്റ നെയ്മര്‍ക്ക് പിന്നീട് ഉളുക്ക് സ്ഥിരീകരിച്ചിരുന്നു. അതിനാല്‍ സ്വിറ്റ്സര്‍ലന്‍ഡിനെതിരായ മത്സരത്തില്‍ കളിച്ചില്ല. ഗ്രൂപ്പിലെ അവസാന മത്സരത്തില്‍ കാമറൂണിനെതിരേയും കളിക്കാന്‍ സാധ്യത കുറവാണ്. ഈ സാഹചര്യത്തിലാണ് തുടര്‍ന്നുള്ള കൂടുതല്‍ പ്രധാനപ്പെട്ട നോക്കൗട്ട് മത്സരങ്ങള്‍ക്കായി സാങ്കേതികവിദ്യയുടെ സഹായം തേടുന്നത്.

ഫിസിയോതെറപ്പി നടത്തുന്നതിനായി പ്രത്യേകതരം കംപ്രഷന്‍ ബൂട്ടാണ് ഉപയോഗിക്കുന്നതെന്ന് നെയ്മര്‍ തന്നെയാണ് സമൂഹ മാധ്യമങ്ങളിലൂടെ അറിയിച്ചത്. മൂന്ന് വ്യത്യസ്ത മസാജ് ടെക്നിക്കുകള്‍ സംയോജിപ്പിച്ച് രക്തചംക്രമണം സജീവമാക്കുകയാണ് ഈ ബൂട്ട് ചെയ്യുന്നത്. ഇത് സിരകളെ ഉത്തേജിപ്പിക്കുകയും വീക്കം കുറയ്ക്കുകയും വേദന ഇല്ലാതാക്കുകയും ചെയ്യും.