പാസ്പോര്‍ട്ട് ലോക റാങ്കിംഗില്‍ ജര്‍മനി രണ്ടാമത്

ബര്‍ലിന്‍: ലോകത്തെ ഏറ്റവും ശക്തമായ പാസ്പോര്‍ട്ട് യുഎഇയുടേതെന്ന് റിപ്പോര്‍ട്ട്. യുഎഇ പാസ്പോര്‍ട്ട് ഉള്ളയാള്‍ക്ക് 180 രാജ്യങ്ങളില്‍ പ്രശ്നരഹിതമായി പ്രവേശിക്കാന്‍ കഴിയും. യുഎഇ പാസ്പോര്‍ട്ട് ഉപയോഗിച്ച് 121 രാജ്യങ്ങളില്‍ വീസയില്ലാതെ പ്രവേശിക്കാം. 59 രാജ്യങ്ങളില്‍ വീസ ഓണ്‍ അറൈവല്‍ ആയും ലഭിക്കും. 19 രാജ്യങ്ങളില്‍ പ്രവേശിക്കുന്നതിനു മാത്രമാണ് യുഎഇ പാസ്പോര്‍ട്ടുള്ളവര്‍ വീസയ്ക്കായി അപേക്ഷിക്കേണ്ടത്. അതായത് ലോകത്തെ 91% രാജ്യങ്ങളിലും യുഎഇ പാസ്പോര്‍ട്ട് ഉള്ളവര്‍ക്ക് സുഗമമായി എത്താം. മോണ്‍ട്രിയല്‍ ആസ്ഥാനമായ സിറ്റിസണ്‍ഷിപ്പ് ഫിനാന്‍ഷ്യല്‍ അഡൈ്വസറി സ്ഥാപനം ആര്‍ട്ടണ്‍ കാപിറ്റല്‍ പുറത്തിറക്കിയ പാസ്പോര്‍ട്ട് ഇന്‍ഡെക്സാണ് ഈ റിപ്പോര്‍ട്ട് പുറത്തുവിട്ടിരിക്കുന്നത്.

യുഎഇക്കു പിന്നാലെ ആദ്യ പത്തില്‍ സ്ഥാനം പിടിച്ചിരിക്കുന്നത് മിക്കതും യൂറോപ്യന്‍ യൂണിയന്‍ രാജ്യങ്ങളാണ്. രണ്ടാം റാങ്കിങ്ങില്‍ ജര്‍മനി, സ്വീഡന്‍, ഫിന്‍ലന്‍ഡ്, ലക്സംബര്‍ഗ്, സ്പെയിന്‍, ഫ്രാന്‍സ്, ഇറ്റലി, നെതര്‍ലന്‍ഡ്സ്,ഓസ്ട്രിയ, സ്വിറ്റ്സര്‍ലന്‍ഡ്, ദക്ഷിണ കൊറിയ എന്നിവയും ഉണ്ട്. മൂന്നാം റാങ്കുള്ള അമേരിക്കയുടെ പാസ്പോര്‍ട്ട് ഉപയോഗിച്ച് 116 രാജ്യങ്ങളില്‍ വീസയില്ലാതെ പ്രവേശിക്കാം. 56 രാജ്യങ്ങളില്‍ വീസ ഓണ്‍ അറൈവല്‍ ആയി ലഭിക്കും. അമേരിക്കന്‍ പൗരന്മാര്‍ അപേക്ഷിച്ചാല്‍ മാത്രം വീസ അനുവദിക്കുന്ന 26 രാജ്യങ്ങളും ഉണ്ട്. യുഎസ് പാസ്പോര്‍ട്ട് ഉപയോഗിച്ച് ലോകത്ത് 83% ഇടങ്ങളില്‍ സുഗമമായി പ്രവേശിക്കാം.

അതേസമയം യുകെ നാലാം സ്ഥാനത്തും, ഇസ്രയേല്‍ 17 ലും, യുദ്ധ നടക്കുന്ന യുക്രെയിന്‍ 20, വത്തിക്കാന്‍ 21 ലുമാണ്.
24ാം സ്ഥാനത്തുള്ള ജപ്പാന്റെ പാസ്പോര്‍ട്ട് ഉപയോഗിച്ച് 171 രാജ്യങ്ങളില്‍ സുഗമമായി പ്രവേശിക്കാന്‍ കഴിയും. അതേ സമയം ഹെന്‍ലെ ആന്‍ഡ് പാര്‍ട്നേഴ്സ് പുറത്തിറക്കിയ പട്ടികയില്‍ ജപ്പാന്‍ പാസ്പോര്‍ട്ടാണ് ലോകത്തിലെ ഏറ്റവും മികച്ചത് എന്ന് കണ്ടെത്തിയിട്ടുണ്ട്.

റഷ്യ 38, ചൈന 59, നേപ്പാള്‍ 86 ഉത്തര കൊറിയ 91, ബംഗ്ളദേശ് 92. പട്ടികയില്‍ ഏറ്റവും അവസാനം അഫ്ഗാനിസ്ഥാനാണ് (97). പാക്കിസ്ഥാന്റെ റാങ്ക് 94 ആണ്.

എന്നാല്‍ ശക്തമായ പാസ്പോര്‍ട്ടിന്റെ പട്ടികയില്‍ ഇന്ത്യയുടെ റാങ്ക് 69 ആണ്. വീസയില്ലാതെ 24 രാജ്യങ്ങളില്‍ ഇന്ത്യന്‍ പാസ്പോര്‍ട്ട് ഉപയോഗിച്ച് പ്രവേശിക്കാം. 48 രാജ്യങ്ങളില്‍ ഓണ്‍ അറൈവല്‍ വീസ ലഭിക്കും. 126 രാജ്യങ്ങളില്‍ വീസയ്ക്ക് അപേക്ഷ നല്‍കി അതനുവദിച്ചു കിട്ടിയാല്‍ മാത്രമേ പ്രവേശനം അനുവദിക്കൂ. ഇന്ത്യയ്ക്കൊപ്പം 6 രാജ്യങ്ങള്‍ കൂടിയുണ്ട്.

ഐക്യരാഷ്ട്ര സംഘടനയില്‍ (യുഎന്‍) അംഗങ്ങളായ 139 രാജ്യങ്ങളെയും അംഗത്വത്തിനു പരിഗണിക്കുന്ന ആറു പ്രദേശങ്ങളെയും അടിസ്ഥാനമാക്കിയാണ് ആര്‍ട്ടണ്‍ കാപിറ്റല്‍ പട്ടിക പുറത്തിറക്കിയിരിക്കുന്നത്.