പഴയതൊക്കെ മറന്നു, ഓർമ്മ നഷ്‌ടപ്പെടുന്ന അവസ്ഥയിൽ നടി ഭാനുപ്രിയ

രാജശില്പി, അഴകിയ രാവണൻ, കൊച്ചു കൊച്ചു സന്തോഷങ്ങൾ, കുലം തുടങ്ങിയ സിനിമകളിലൂടെ മലയാളികളുടെ പ്രിയങ്കരിയായി മാറിയ നടിയാണ് ഭാനുപ്രിയ. ആന്ധ്രക്കാരിയായ ഭാനുപ്രിയയെ മലയാളികൾ ഇരുകയ്യും നീട്ടി സ്വീകരിച്ചു. വിവാഹശേഷവും ഭാനുപ്രിയ സിനിമയിൽ സജീവമായിരുന്നെങ്കിലും, മലയാളത്തിൽ സജീവമായിരുന്നില്ല. ക്ലാസിക്കൽ നർത്തകിയായ ഭാനുപ്രിയ നൃത്തത്തിലും സജീവമല്ലാതായി. ഭർത്താവ് 2018ൽ ഹൃദയാഘാതം മൂലം മരണമടയുകയും ചെയ്തു.

ഇപ്പോഴിതാ തന്റെ ആരോഗ്യ അവസ്ഥയെപ്പറ്റി ഭാനു പ്രിയ പങ്കുവച്ച കാര്യങ്ങളാണ് ശ്രദ്ധ നേടുന്നത്. ഒരു തെലുങ്ക് യൂട്യൂബ് ചാനലിന് നൽകിയ അഭിമുഖത്തിൽ താൻ ഓർമക്കുറവ് നേരിടുന്നന്തായി ഭാനുപ്രിയ വെളിപ്പെടുത്തി.

ഭാനു പ്രിയയുടെ വാക്കുകൾ: 

'എനിക്ക് ഈയിടെയായി സുഖമില്ല. ഓർമ്മശക്തി കുറയുന്നു. പഠിച്ച ചില കാര്യങ്ങൾ ഞാൻ മറന്നു. പിന്നീട് നൃത്തത്തോടുള്ള താൽപര്യം കുറഞ്ഞു. വീട്ടിൽ പോലും ഞാൻ നൃത്തം പരിശീലിക്കാറില്ല,' ഭാനുപ്രിയ പറഞ്ഞു. കഴിഞ്ഞ രണ്ട് വർഷമായി ഓർമക്കുറവ് അനുഭവപ്പെടുന്നു. അടുത്തിടെ ഒരു സിനിമാ ലൊക്കേഷനിൽ വെച്ച് ഡയലോഗുകൾ മറന്നു. ഓർത്തിരിക്കേണ്ട പലതും താൻ മറക്കുകയാണ്. അടുത്തിടെ 'സില നേരങ്ങളിൽ സില മനിദർഗൾ' എന്ന സിനിമയിലൂടെ സെറ്റിൽ വച്ച് ഡയലോഗുകൾ മറന്നു. പിരിമുറുക്കമോ വിഷാദമോ തന്നെ അലട്ടുന്നില്ല. മറവിക്ക്‌ കാരണം മോശം ആരോഗ്യാവസ്ഥ മാത്രമാണ്. ചില മരുന്നുകൾ കഴിക്കുന്നു .

ഭർത്താവുമായി പിരിഞ്ഞിരുന്നു എന്ന വാർത്ത തെറ്റാണ്. അദ്ദേഹം ഹൈദരാബാദിലും താൻ ചെന്നൈയിലും ആയിരുന്നു താമസം. അവസരം കിട്ടുമ്പോൾ അഭിനയിച്ചു. ഒരുപാട് യാത്ര ചെയ്തു.  20കാരിയായ അഭിനയ ഏകമകളാണ്. ലണ്ടനിലെ ലോഫ്ബറോ യൂണിവേഴ്സിറ്റി വിദ്യാർത്ഥിനിയാണ്. നാച്ചുറൽ സയൻസ് ആണ് വിഷയം. അവധി കിട്ടുമ്പോൾ അവൾ അടുത്തെത്തും.