ഫോഴ്സ് മോട്ടോഴ്സ് പുതിയ അഞ്ച് ഡോർ ഗൂർഖ അവതരിപ്പിച്ചു

പുതിയ അഞ്ച് ഡോർ ഗൂർഖയും പുതുക്കിയ മൂന്ന് ഡോർ ഗൂർഖയും അവതരിപ്പിച്ചു. 25,000 രൂപ ടോക്കൺ ബുക്കിംഗ് തുകയിൽ ഈ ലൈഫ്‌സ്‌റ്റൈൽ ഓഫ്-റോഡ് എസ്‌യുവികൾക്കായുള്ള രാജ്യവ്യാപക ബുക്കിംഗും കമ്പനി ആരംഭിച്ചു. ലോഞ്ച് തീയതി ഇതുവരെ പ്രഖ്യാപിച്ചിട്ടില്ലെങ്കിലും, 2024 മെയ് ആദ്യവാരം ഷോറൂമുകളിൽ എത്തുമെന്ന് സ്ഥിരീകരിച്ചിട്ടുണ്ട്.

ഇപ്പോള്‍ സെഗ്‌മെന്റ് പുനര്‍നിര്‍വചിക്കാനാവശ്യമായ സാങ്കേതിക സവിശേഷതകള്‍ ഉള്‍പ്പെടുത്തി ഈ എസ്‌യുവിയുടെ 5 സീറ്റര്‍ പതിപ്പും ഒപ്പം അപ്‌ഡേറ്റഡ് 3 ഡോര്‍ പതിപ്പും കമ്പനി അവതരിപ്പിച്ചിരിക്കുന്നു. മഹീന്ദ്രയുടെ ഥാർ എന്ന ജനപ്രിയ മോഡലിന് ഇരുട്ടടിയുമായാണ് പുത്തൻ ഗൂർഖ എത്തുന്നത് എന്നതാണ് പ്രത്യേകത.

പുതുക്കിയ ഫോഴ്‌സ് ഗൂർഖ അതിൻ്റെ ഐക്കണിക് ബോക്‌സി ലുക്ക് നിലനിർത്തുന്നു. 'ഗൂർഖ' ബാഡ്ജോടുകൂടിയ ദീർഘചതുരാകൃതിയിലുള്ള ഫ്രണ്ട് ഗ്രിൽ, എൽഇഡി ഡേടൈം റണ്ണിംഗ് ലൈറ്റുകളുള്ള റെട്രോ-സ്റ്റൈൽ വൃത്താകൃതിയിലുള്ള എൽഇഡി ഹെഡ്‌ലാമ്പുകൾ, മധ്യഭാഗത്ത് ചെറിയ എയർ ഡാമോടുകൂടിയ കറുത്ത ഫ്രണ്ട് ബമ്പർ, റൗണ്ട് ഫോഗ് ലാമ്പുകൾ എന്നിവയാണ് പുതിയ രൂപകൽപ്പനയുടെ സവിശേഷതകൾ.

5-ഡോർ പതിപ്പ് 3-ഡോർ മോഡലിൻ്റെ ലോംഗ്-വീൽബേസ് വേരിയൻ്റാണ്. സ്ക്വാറിഷ് വീൽ ആർച്ചുകൾ, പുതുതായി രൂപകൽപ്പന ചെയ്ത 18 ഇഞ്ച് ഡ്യുവൽ-ടോൺ അലോയ് വീലുകൾ, അധിക ഡോറുകൾ എന്നിവ എസ്‌യുവിയുടെ സവിശേഷതകളാണ്. അതിൽ ഫാക്ടറിയിൽ ഘടിപ്പിച്ച സ്നോർക്കൽ ഉൾപ്പെടുന്നു, കൂടാതെ മേൽക്കൂര റാക്ക് ഒരു ഓപ്ഷണൽ ഫീച്ചറായി വാഗ്ദാനം ചെയ്യുന്നു.