ഷവോമി തങ്ങളുടെ ആദ്യത്തെ ഇലക്ട്രിക് വാഹനം അവതരിപ്പിച്ചു

ഷവോമി തങ്ങളുടെ ആദ്യത്തെ ഇലക്ട്രിക് വാഹനം ചൈനയിൽ അവതരിപ്പിച്ചു. എസ് യു 7 എന്നാണ് ഇത് അറിയപ്പെടുന്നത്. ഇത് ഒരു ഇലക്ട്രിക് സെഡാനാണ്. ഷവോമി SU7-ന്റെ രണ്ട് പതിപ്പുകളും കമ്പനി പ്രദർശിപ്പിച്ചു. ഷവോമി എസ്‍യു7 സെഡാൻ ചൈനയിൽ വിൽപ്പന ലൈസൻസിനായും കമ്പനി അപേക്ഷിച്ചു.

തങ്ങളുടെ ആദ്യത്തെ ഇലക്ട്രിക് കാറിന്റെ ചില ചിത്രങ്ങളും കമ്പനി പങ്കുവെച്ചിട്ടുണ്ട്. പുതിയ ഷവോമി എസ്‍യു7 ഒരു കരാർ പ്രകാരം ബീജിംഗ് ഓട്ടോമോട്ടീവ് ഇൻഡസ്ട്രി ഹോൾഡിംഗ് കമ്പനി ലിമിറ്റഡ് നിർമ്മിക്കും. 

ചൈനയിലെ ഓരോ കാറും വിപണിയിൽ എത്തുന്നതിന് മുമ്പ് പ്രാദേശിക റെഗുലേറ്റർ അംഗീകരിച്ചിരിക്കണം. കൂടാതെ വ്യവസായ, വിവര സാങ്കേതിക മന്ത്രാലയം ഹോമോലോഗേഷൻ പ്രക്രിയയിലൂടെ കടന്നുപോകുന്ന വാഹനങ്ങളുടെ ഒരു ലിസ്റ്റ് എല്ലാ മാസവും പുറത്തിറക്കുന്നു.

ഷവോമി SU7 ഇലക്ട്രിക് സെഡാനിൽ മുഖം തിരിച്ചറിയൽ ലോക്ക് / അൺലോക്ക് സിസ്റ്റം നൽകാമെന്ന് ഊഹിക്കപ്പെടുന്നു. ഷവോമി SU7 ഇലക്ട്രിക് സെഡാന്റെ ഉത്പാദനം അടുത്ത മാസം ഡിസംബർ മുതൽ ആരംഭിക്കുമെന്നും അതിന്റെ വിൽപ്പനയും വിതരണവും 2024 ഫെബ്രുവരി മുതൽ ആരംഭിക്കുമെന്നും പറയപ്പെടുന്നു.