രാഷ്ട്രപതി ദ്രൗപതി മുർമു നാളെ പാർലമെന്റിന്റെ സംയുക്ത സമ്മേളനത്തെ അഭിസംബോധന ചെയ്യും

ന്യൂഡൽഹി: 2026-27 വർഷത്തെ കേന്ദ്ര ബജറ്റ് അവതരിപ്പിക്കുന്നതിന് മുന്നോടിയായി, ബുധനാഴ്ച രാവിലെ 11 മണിക്ക് രാഷ്ട്രപതി ദ്രൗപതി മുർമു പാർലമെന്റിന്റെ സംയുക്ത സമ്മേളനത്തെ അഭിസംബോധന ചെയ്ത് സംസാരിക്കും.

ചരിത്രത്തിലാദ്യമായി ഒരു ഞായറാഴ്ച ബജറ്റ് അവതരിപ്പിക്കപ്പെടുന്നു എന്ന പ്രത്യേകതയും ഈ വർഷത്തിനുണ്ട്. നിർമല സീതാരാമൻ പാർലമെന്റിൽ അവതരിപ്പിക്കുന്ന ഒമ്പതാമത്തെ ബജറ്റായിരിക്കും ഇത്.

ആദ്യ ഘട്ടം ജനുവരി 28-ന് രാഷ്ട്രപതിയുടെ പ്രസംഗത്തോടെ ആരംഭിച്ച് ഫെബ്രുവരി 13-ന് അവസാനിക്കും. രണ്ടാം ഘട്ടം ഒരു ഇടവേളയ്ക്ക് ശേഷം മാർച്ച് 9-ന് ആരംഭിച്ച് ഏപ്രിൽ 2 വരെ തുടരും.

ആകെ 30 സിറ്റിംഗുകളാണ് സമ്മേളനത്തിൽ ഉണ്ടാവുകയെന്ന് കേന്ദ്ര പാർലമെന്ററി കാര്യ മന്ത്രി കിരൺ റിജിജു അറിയിച്ചു. നിലവിൽ ഒമ്പതോളം ബില്ലുകൾ ലോക്സഭയിൽ പരിഗണനയ്ക്കുണ്ട്. 

ഇതിൽ ഡെവലപ്പ്ഡ് ഇന്ത്യ എഡ്യൂക്കേഷൻ ഫൗണ്ടേഷൻ ബിൽ, സെക്യൂരിറ്റീസ് മാർക്കറ്റ് കോഡ്, ഭരണഘടനാ (129-ാം ഭേദഗതി) ബിൽ തുടങ്ങിയ ബില്ലുകൾ അവതരിപ്പിക്കുമെന്നാണ് കണക്കാക്കുന്നത്. 

ഈ ബില്ലുകളെല്ലാം നിലവിൽ പാർലമെന്ററി സ്റ്റാൻഡിംഗ് കമ്മിറ്റികളുടെയോ സെലക്ട് കമ്മിറ്റികളുടെയോ പരിശോധനയിലാണ്.

ബജറ്റ് രേഖകളുടെ അച്ചടി ആരംഭിക്കുന്നതിന്റെ ഭാഗമായി ധനമന്ത്രാലയം പരമ്പരാഗതമായ 'ഹൽവ ചടങ്ങ്' നടത്താറുണ്ട്. ബജറ്റ് പാർലമെന്റിൽ അവതരിപ്പിക്കുന്നത് വരെ വിവരങ്ങൾ ചോരാതിരിക്കാനുള്ള 'ലോക്ക്-ഇൻ' കാലയളവിന്റെ തുടക്കം കൂടിയാണിത്.

നരേന്ദ്ര മോദി 3.0 സർക്കാരിന്റെ മൂന്നാമത്തെ പൂർണ്ണ ബജറ്റാണിത്. ഫെബ്രുവരി 2 മുതൽ 4 വരെ രാഷ്ട്രപതിയുടെ പ്രസംഗത്തിനുള്ള നന്ദി പ്രമേയത്തിന്മേലുള്ള ചർച്ചകൾ നടക്കും. ജനുവരി 28-നും ഫെബ്രുവരി 1-നും 'സീറോ അവർ' (Zero Hour) ഉണ്ടായിരിക്കില്ല.

ബുധനാഴ്ച രാവിലെ 10:30-ഓടെ പാർലമെന്റിൽ എത്താൻ ലോക്സഭാ സെക്രട്ടറി ജനറൽ പി.സി. മോദി അംഗങ്ങളോട് അഭ്യർത്ഥിച്ചു. രാഷ്ട്രപതി 10:55-ന് എത്തിച്ചേരുകയും 11 മണിക്ക് പ്രസംഗം ആരംഭിക്കുകയും ചെയ്യും. രാഷ്ട്രപതിയുടെ പ്രസംഗം കഴിയുന്നത് വരെ സഭയിൽ നിന്ന് പുറത്തുപോകരുതെന്നും നിർദ്ദേശമുണ്ട്.