80 സി, ഡി പരിധികള്‍ ഉയര്‍ത്തുമോ? ആദായ നികുതി നിയമത്തിൽ പ്രതീക്ഷിക്കുന്ന 5 പ്രധാന മാറ്റങ്ങൾ

ഫെബ്രുവരി 1-ന് രണ്ടാം മോദി സർക്കാരിന്റെ അവസാന സമ്പൂർണ ബജറ്റിനാണ് സാക്ഷ്യം വഹിക്കുക. വരുന്ന പൊതുബജറ്റിൽ മാറ്റം വരുത്തിയേക്കുമെന്ന് പ്രതീക്ഷിക്കുന്ന 5 പ്രധാന ആദായ നികുതി നിയമങ്ങളാണ് ചുവടെ ചേർക്കുന്നത്.

80-സി പരി​ധി ഉയർത്തുക

നികുതി ആനുകൂല്യം നേടുന്നതിനായി ആദായ നികുതി നിയമത്തിലെ 80-സി ചട്ടം ബഹുഭൂരിപക്ഷം നികുതി ദായകരും ഉപയോ​ഗപ്പെടുത്തുന്നുണ്ട്. പി.പി.എഫ്/ ഇ.പി.എഫ്/ ഇ.എൽ.എസ്.എസ്/ എൻ.എസ്.സി/ എൻ.പി.എസ്/ എസ്.എസ്.വൈ എന്നീ ജനപ്രിയ നിക്ഷേപമാർ​ഗങ്ങളിലൊക്കെയും 80-സി പ്രയോജനപ്പെടുത്തി നികുതി ലാഭിക്കാം. നിലവിൽ 80-സിയിലൂടെ 1.5 ലക്ഷം രൂപ വരെ വാർഷികമായി നികുതി ഇളവ് നേടാനാകും.

അടിസ്ഥാന വരുമാന പരിധി ഉയർത്തുക

നികുതി ബാധകമാകുന്നതിനുള്ള അടിസ്ഥാന വരുമാന പരിധി 5 ലക്ഷത്തിലേക്ക് ഉയർത്തുമെന്ന് മിക്ക സാമ്പത്തിക വിദ​ഗ്ധർ പൊതുവേ പ്രതീക്ഷിക്കുന്നുണ്ട്. നിലവിൽ പുതിയ/ പഴയ നികുതി സമ്പ്രദായങ്ങളിൽ വാർഷികമായി 2.5 ലക്ഷം രൂപ വരെ നേടുന്നവരെയാണ് ഒഴിവാക്കിയിട്ടുള്ളത്. മുൻകാലങ്ങളിലെ വിവിധ മാറ്റങ്ങളിലൂടെ 5 ലക്ഷം രൂപ വരെ വാർഷിക വരുമാനമുള്ളവർക്ക് ഫലത്തിൽ നികുതി ബാധ്യത ഒഴിവാക്കിയെടുക്കാനാകും.

80-ഡി ഉയർത്തുക

മഹാമാരിക്ക് ശേഷം എല്ലാ രോ​ഗങ്ങളും കവർ ചെയ്യുന്ന മെഡിക്കൽ ഇൻഷൂറൻസ് സേവനങ്ങൾക്കും ഉയർന്ന തുക പരിരക്ഷ വാ​ഗ്ദാനം ചെയ്യുന്ന പോളിസികൾക്കുമുള്ള താത്പര്യം വർധിച്ചു. ഈയൊരു പശ്ചാത്തലത്തിൽ ചട്ടം 80-ഡി പ്രകാരം കൂടുതൽ നികുതി നേട്ടം ഇത്തവണത്തെ ബജറ്റിൽ ലഭ്യമാക്കുമെന്നാണ് സാമ്പത്തിക വിദ​ഗ്ധർ പ്രതീക്ഷിക്കുന്നത്.

ഭവന വായ്പയിൽ കൂടുതൽ നികുതി ആനുകൂല്യം

ഭവന വായ്പയുടെ മുതൽ തുകയിലേക്കും പലിശയിലേക്കുമുള്ള തിരിച്ചടവിനും കൂടുതൽ ആനുകൂല്യം പുതിയ ബജറ്റിൽ ലഭിക്കുമെന്നാണ് ഭൂരിപക്ഷം സാമ്പത്തിക വിദ​ഗ്ധരും പ്രതീക്ഷിക്കുന്നത്. കഴിഞ്ഞ 5 വർഷങ്ങൾക്കിടെ രാജ്യത്താകമാനം ഭൂമി വില വർധിച്ചതും 6%-7% നിരക്കിൽ പണപ്പെരുപ്പും തുടരുന്ന പശ്ചാത്തലത്തിൽ 24 (ബി) വകുപ്പ് പ്രകാരമുള്ള ഭവന വായ്പയുടെ നികുതി ആനുകൂല്യം ഉയർത്തുന്നത് സർക്കാർ പരി​ഗണിച്ചേക്കുമെന്നാണ് വിലയിരുത്തൽ. നിലവിൽ ഭവന വായ്പയിന്മേൽ പ്രതിവർഷം 2 ലക്ഷം രൂപ വരെയാണ് പലിശ അടയ്ക്കുന്നതിലുള്ള നികുതി കിഴിവ് ലഭിക്കുക. ഇത് ചുരുങ്ങിയത് 3 ലക്ഷത്തിലേക്ക് ഉയർത്തുമെന്നാണ് പ്രതീക്ഷിക്കുന്നത്.

മൂലധന നേട്ടത്തിന്മേലുള്ള നികുതി

ഓഹരിയിലും മ്യൂച്ചൽ ഫണ്ടിലും നിക്ഷേപിക്കുന്ന റീട്ടെയിൽ ഇൻവെസ്റ്റേർസിന് ദീർഘകാല മൂലധന നേട്ടത്തിനുള്ള നികുതി ആനുകൂല്യം വർധിപ്പിക്കണമെന്നും ചില സാമ്പത്തിക വിദ​ഗ്ധർ ചൂണ്ടിക്കാട്ടി. നിലവിൽ ഒരു ലക്ഷം രൂപയ്ക്കു മുകളിൽ ഓഹരിയിൽ നിന്നും നേടുന്ന ദീർഘകാല മൂലധന നേട്ടത്തിനു 10 ശതമാനം നിരക്കിലാണ് എൽടിസിജി ടാക്സ് ചുമത്തുന്നത്. ഈ നികുതി ഒഴിവാക്കം എന്നാണ് നിക്ഷേപകരുടെ പൊതു ആവശ്യം.