ഞാന്‍ ഒരുപാട് സിനിമകള്‍ വേറെ ചെയ്തിട്ടുണ്ടെങ്കിലും അവര്‍ അത് കണ്ടിട്ടില്ല, ദൃശ്യം മാത്രമാണ് കണ്ടത്, ആരേയും കുറ്റം പറയാന്‍ പറ്റില്ല: അന്‍സിബ

ദൃശ്യം കാരണം മാത്രം അറിയപ്പെടുന്ന നടിയെന്ന് പരിഹസിക്കുന്നവര്‍ക്ക് മറുപടിയുമായി നടി അന്‍സിബ. 

''ദൃശ്യം 3 അടുത്ത മാസം ചിത്രീകരണം തുടങ്ങും. അതിന്റെ ഡേറ്റും കാര്യങ്ങളും എല്ലാം ലഭിച്ചു. വളരെ സന്തോഷം ഉണ്ട് ആ സിനിമ ആരംഭിക്കുന്നതില്‍. എന്നെ ചിലര്‍ കളിയാക്കുന്നതും ട്രോളും എല്ലാം ഞാന്‍ കാണാറുണ്ട്.

ദൃശ്യം വരുമ്പോള്‍ മാത്രം പൊങ്ങി വരുന്ന നായിക, പെണ്‍കുട്ടി എന്നെല്ലാം പറഞ്ഞുകൊണ്ട്. ട്രോളുകള്‍ എനിക്കും ആളുകള്‍ അയച്ചു തരാറുണ്ട്. 

എന്റെ ഏറ്റവും അധികം കണ്ട സിനിമ അതാണ്. ഞാന്‍ ഒരുപാട് സിനിമകള്‍ വേറെ ചെയ്തിട്ടുണ്ടെങ്കിലും അവര്‍ അത് കണ്ടിട്ടില്ല. ആരേയും കുറ്റം പറയാന്‍ പറ്റില്ല. പക്ഷെ അവര്‍ എന്നെ അങ്ങനെ ഓര്‍ക്കുന്നുണ്ടല്ലോ എന്ന സന്തോഷമുണ്ട്. 

കെജിഎഫില്‍ യാഷ് പറയുന്ന ഡയലോഗുണ്ട്, ആരെയങ്കിലും പത്ത് പേരെ തല്ലി ഡോണ്‍ ആയതല്ല, ഞാന്‍ തല്ലിയ പത്തു പേരും ഡോണ്‍ ആയിരുന്നുവെന്ന്. ആ പറഞ്ഞത് പോലെ ഞാന്‍ ചെയ്ത ഏതെങ്കിലും ഒരു സിനിമ ചെയ്ത് പ്രശസ്തയായ ആളല്ല ഞാന്‍. 

ഞാന്‍ ചെയ്ത സിനിമ ദൃശ്യം എന്ന ബ്രാന്‍ഡ് ആണെന്ന് കുറച്ച് അഹങ്കാരത്തോടെ തന്നെ ഞാന്‍ പറയും. അതുകൊണ്ട് കളിയാക്കലുകളും ട്രോളുകളും എന്നെ ഒരിക്കലും സങ്കടപ്പെടുത്തില്ല...''