പൊങ്കല്‍ ദിനത്തില്‍ പുതിയ ലുക്കില്‍ രാജാസാബ് പോസ്റ്റര്‍

പൊങ്കല്‍ ദിനത്തില്‍ രാജാസാബിന്റെ പുതിയ ലുക്കുമായി റിബല്‍ സ്റ്റാര്‍ പ്രഭാസ്. 2025ല്‍ പ്രഭാസ് ആരാധകര്‍ ഏറെ ആകാംക്ഷയോടെ കാത്തിരിക്കുന്ന ചിത്രമാണ് രാജാസാബ്. 

ഹൊറര്‍-കോമഡി ജോണറില്‍ കഥ പറയുന്ന ചിത്രം സംവിധാനം ചെയ്യുന്നത് പ്രശസ്ത തെലുങ്ക് സംവിധായകന്‍ മാരുതിയാണ്. 'കല്‍ക്കി 2898 എഡി'യുടെ വന്‍ വിജയത്തിന് ശേഷം പ്രഭാസിന്റേതായി അണിയറയില്‍ ഒരുങ്ങുന്ന ചിത്രമാണ് 'ദി രാജാസാബ്'. 

ഏപ്രില്‍ 10നായിരുന്നു സിനിമ റിലീസ് ചെയ്യാന്‍ തീരുമാനിച്ചിരുന്നത്. എന്നാല്‍ റിലീസ് തീയതി നീട്ടിയതായാണ് പിങ്ക് വില്ല റിപ്പോര്‍ട്ട് ചെയ്യുന്നത്. പുതിയ റിലീസ് തീയതി ഉടന്‍ അറിയിക്കുമെന്നാണ് സൂചന. ഫാമിലി എന്റര്‍ടെയ്‌നറായെത്തിയ 'പ്രതി റോജു പാണ്ഡഗെ', റൊമാന്റിക് കോമഡി ചിത്രമായ 'മഹാനുഭാവുഡു' എന്നീ സിനിമകള്‍ക്ക് ശേഷം മാരുതി തിരക്കഥയെഴുതി സംവിധാനം ചെയ്യുന്ന ചിത്രമാണ് 'ദ രാജാ സാബ്'. 

സമാനതകളില്ലാത്ത സ്‌റ്റൈലിലും സ്വാഗിലുമുള്ളതായിരുന്നു രാജാസാബിന്റെ മോഷന്‍ പോസ്റ്റര്‍. പ്രഭാസിന്റെ പിറന്നാള്‍ ദിനമായ ഒക്ടോബര്‍ 23നായിരുന്നു മോഷന്‍ പോസ്റ്റര്‍ പുറത്തിറക്കിയത്. മാളവിക മോഹനനാണ് ചിത്രത്തില്‍ നായിക. തെലുങ്ക്, തമിഴ്, മലയാളം, കന്നഡ, ഹിന്ദി എന്നീ അഞ്ച് ഭാഷകളിലായി രാജാസാബ് പുറത്തിറങ്ങും.