കീമോ ചെയ്ത് ആശുപത്രിയില്‍ കിടന്നപ്പോള്‍ ഭാര്യ എന്നെ ഉപേക്ഷിച്ച് പോയി, ഞാന്‍ ആഭാസനാണ്, കള്ളുകുടിയനാണ്, പെണ്ണുപിടിയനാണെന്ന് പറഞ്ഞ് മകളെയും അകറ്റി: കൊല്ലം തുളസി

കീമോ ചെയ്ത് ആശുപത്രിയില്‍ കിടന്നപ്പോള്‍ ഭാര്യ തന്നെ ഉപേക്ഷിച്ച് പോയതാണെന്ന് നടന്‍ കൊല്ലം തുളസി. കൊല്ലം ഗാന്ധി ഭവനില്‍ നടന്ന പരിപാടിയില്‍ സംസാരിക്കുകയായിരുന്നു അദ്ദേഹം. 

''ഭാര്യ എന്നെ ഉപേക്ഷിച്ചുപോയി. എന്റെ ഏറ്റവും വലിയ വിഷമം മകളെ പോലും എന്നില്‍ നിന്നകറ്റി എന്നുള്ളതാണ്. കലാകാരന്‍ എന്ന നിലയില്‍ സാമൂഹിക പ്രതിബദ്ധതയുള്ളയാളാണ് ഞാന്‍. അത്രയും മോശമാണ് ഞാനെന്ന് ഇതുവരെ തോന്നിയിട്ടില്ല. 

13 വര്‍ഷമായി എനിക്ക് ക്യാന്‍സര്‍ വന്നിട്ട്. അസുഖം ബാധിച്ചിട്ടും ഇങ്ങനെയെരിക്കുന്ന അപൂര്‍വം ചിലരില്‍ ഒരാളാണ് ഞാന്‍. ചെയ്ത പുണ്യകര്‍മങ്ങളുടെ ഫലമാണിതെന്നാണ് ഞാന്‍ വിശ്വസിക്കുന്നത്.

കീമോ ചെയ്ത ശേഷം ഞാന്‍ ആശുപത്രിയില്‍ കിടന്നപ്പോള്‍ എന്നെ ഉപേക്ഷിച്ച് പോയതാണ് ഭാര്യ. അന്നൊരു വാക്ക് പോലും പറഞ്ഞില്ല. ചാവാന്‍ കിടക്കുന്ന അങ്ങേരെ ഞാനെന്തിനാ കാണുന്നെ എന്നാണ് അവര്‍ ജോലിക്കാരിയോട് പറഞ്ഞത്. 

ഞങ്ങള്‍ തമ്മില്‍ മാനസികമായി ഐക്യം ഇല്ലായിരുന്നു. ഞാന്‍ ആഭാസനാണ്, കള്ളുകുടിയനാണ്, പെണ്ണുപിടിയനാണ് എന്നെല്ലാം പറഞ്ഞ് മകളുടെ മനസ് മാറ്റി. ഒരമ്മ മകളോട് ഇങ്ങനെ പറഞ്ഞാല്‍ അവര്‍ ഉറപ്പായും ഇത് വിശ്വസിക്കും. 

ഒരു ദ്രോഹവും ഞാന്‍ ചെയ്തിട്ടില്ല. ഞാന്‍ വിളിച്ചാല്‍ പോലും മകള്‍ ഫോണെടുക്കാറില്ല. വളരെ ദുഃഖമുണ്ടായിരുന്നു. പക്ഷേ, ഇപ്പോള്‍ ഞാന്‍ അതേപ്പറ്റി ചിന്തിക്കാറില്ല. ആ പേജ് ഞാന്‍ വലിച്ചുകീറി. 

ഒറ്റപ്പെടല്‍ അനുഭവപ്പെട്ടപ്പോഴാണ് ഗാന്ധിഭവനില്‍ പോയത്. പലരും ചോദിച്ച് കാശുള്ള നിങ്ങളെന്തിനാ ഇവിടെ വന്ന് കിടക്കുന്നതെന്ന്. അന്നെനിക്ക് പെന്‍ഷന്‍ മാത്രമേയുള്ളൂ. കാശ് മുഴുവന്‍ പലരും പറ്റിച്ചുകൊണ്ട് പോയി. ആറ് മാസത്തോളം അവിടെ താമസിച്ചു. ഇവിടെ ഉള്ളവരുടെ കഥകള്‍ കേള്‍ക്കുമ്പോള്‍ നമുക്ക് അത്രയും പ്രശ്നമില്ലല്ലോ എന്ന് തോന്നിപ്പോകും...''