ചില ആളുകള്‍ക്ക് ഞാന്‍ ജീവിച്ചിരിക്കുന്നതില്‍ അസ്വസ്ഥതയുണ്ടെന്ന് തോന്നുന്നു, ജീവിച്ചിരിപ്പുണ്ടെന്ന് ആളുകളോട് പറഞ്ഞ് എന്റെ തൊണ്ടയും നാവും ചുണ്ടുകളും വറ്റിവരണ്ടു: റാസ മുറാദ്

ചില ആളുകള്‍ക്ക് താന്‍ ജീവിച്ചിരിക്കുന്നതില്‍ അസ്വസ്ഥതയുണ്ടെന്ന് തോന്നുന്നതായി നടന്‍ റാസ മുറാദ്. 

''ചില ആളുകള്‍ക്ക്, എന്തിനാണെന്ന് എനിക്കറിയില്ല, ഞാന്‍ ജീവിച്ചിരിക്കുന്നതില്‍ അസ്വസ്ഥതയുള്ളതായി തോന്നുന്നു. അവര്‍ എന്റെ മരണത്തെക്കുറിച്ച് പോസ്റ്റ് ചെയ്യുകയും അനുശോചനം അറിയിക്കുകയും ചെയ്തു. 

ഞാന്‍ വര്‍ഷങ്ങളോളം പ്രവര്‍ത്തിച്ചു. എന്നാല്‍ ഇപ്പോള്‍ എന്നെ ഓര്‍ക്കാന്‍ ആരുമില്ല. എന്റെ ജന്മദിനവും ഒരു വ്യാജ മരണ തീയതിയും അവര്‍ ആ പോസ്റ്റില്‍ പരാമര്‍ശിച്ചു. ഇത് വളരെ ഗൗരവമേറിയ ഒരു വിഷയമാണ്.

ജീവിച്ചിരിപ്പുണ്ടെന്ന് ആളുകളോട് പറഞ്ഞ് എന്റെ തൊണ്ടയും നാവും ചുണ്ടുകളും വറ്റിവരണ്ടു. ഈ വ്യാജവാര്‍ത്ത എല്ലായിടത്തും പ്രചരിച്ചു കഴിഞ്ഞു. ലോകത്തിന്റെ വിവിധ ഭാഗങ്ങളില്‍ നിന്ന് എനിക്ക് കോളുകളും സന്ദേശങ്ങളും വരുന്നുണ്ട്. ആളുകള്‍ ആ പോസ്റ്റിന്റെ പകര്‍പ്പുകള്‍ പോലും അയച്ചുതരുന്നു. 

ഇത് ചെയ്തയാള്‍ക്ക് വളരെ മോശം മാനസികാവസ്ഥയായിരിക്കും. അയാള്‍ ജീവിതത്തില്‍ കാര്യമായൊന്നും നേടാത്ത, വളരെ ചെറിയ ഒരു വ്യക്തിയാണെന്ന് തോന്നുന്നു. അതുകൊണ്ടാണ് ഇത്തരം വിലകുറഞ്ഞ കാര്യങ്ങള്‍ ചെയ്യുന്നതില്‍ അയാള്‍ ആനന്ദം കണ്ടെത്തുന്നത്. 

പോലീസ് എന്റെ പരാതി ഗൗരവമായി എടുക്കുന്നുണ്ട്. അവര്‍ എന്റെ പരാതി സ്വീകരിച്ച് എഫ്ഐആര്‍ രജിസ്റ്റര്‍ ചെയ്യുകയാണ്. ഇതിന്റെ ഉറവിടം കണ്ടെത്തുമെന്നും ഉത്തരവാദിയായ വ്യക്തിയെ പിടികൂടുമെന്നും അവര്‍ ഉറപ്പുനല്‍കി. അയാള്‍ക്കെതിരെ നിയമനടപടി സ്വീകരിക്കും. 

ഇത് ഇനി നിര്‍ത്തണം. ഇത് എന്റെ മാത്രം കാര്യമല്ല. പല പ്രശസ്തരും ജീവിച്ചിരിക്കുമ്പോള്‍ തന്നെ മരിച്ചതായി പ്രഖ്യാപിക്കപ്പെടുന്നു. ഇത് തെറ്റാണ്, ഇത് ചെയ്യുന്നവര്‍ ആരായാലും ശിക്ഷിക്കപ്പെടണം..''