ബാല്യം കയ്പ്പേറിയത്, ദാരിദ്ര്യവും പട്ടിണിയും അനുഭവിച്ചിട്ടുണ്ട്: ജാഫര്‍ ഇടുക്കി

ബാല്യം കയ്പ്പേറിയതായിരുന്നുവെന്ന് നടനും മിമിക്ര താരവുമായ ജാഫര്‍ ഇടുക്കി. 

'' എന്റെ ബാല്യം കയ്പ്പേറിയതായിരുന്നു. എങ്കിലും അവയില്‍ സന്തോഷമുണ്ടായിരുന്നു. ഓര്‍മകളെന്നു പറയുമ്പോള്‍ ഒരുപാടുണ്ട്. എനിക്ക് മൂന്നു വയസുള്ളപ്പോള്‍ നാട്ടില്‍ നടന്ന ഒരു ലോറി അപകടം മുതല്‍ എന്റെ മനസില്‍ തങ്ങി നില്‍ക്കുന്നുണ്ട്. 

കുടപ്പന കേറ്റികൊണ്ടു പോകുവായിരുന്ന ഏതെങ്കിലും ലോറിയില്‍ കയറി ടൗണില്‍ പോകാന്‍ നില്‍ക്കുകയായിരുന്നു ബാപ്പ. ലോറി വരുന്നതു കണ്ട് ബാപ്പ കൈനീട്ടി. കുറച്ചു മാറി ലോറി നിര്‍ത്താന്‍ ശ്രമിക്കുന്നതിനിടയില്‍ ബാലന്‍സ് തെറ്റി ലോറി മറിയുകയായിരുന്നു. ബാപ്പ ആ വണ്ടിയില്‍ കേറിയിരുന്നെങ്കില്‍ ഞങ്ങളുടെ അവസ്ഥ എന്താകുമായിരുന്നു.

വീട്ടിലെ ബുദ്ധിമുട്ടും പട്ടിണിയും സഹിക്കാന്‍ വയ്യാതെ വന്നപ്പോള്‍ ബാപ്പയെയും ഉമ്മയെയും സഹായിക്കാം എന്നോര്‍ത്താണു പണിക്കു പോയി തുടങ്ങിയത്. അന്ന് ഞാന്‍ അഞ്ചാം ക്ലാസില്‍ പഠിക്കുന്നു. വീടിനടുത്ത് ഒരു റബ്ബര്‍ നേഴ്സറിയുണ്ട്. 

അവിടെ റബ്ബര്‍ ബഡിംഗിനു പോയിത്തുടങ്ങി. മഴവെള്ളം ഒലിച്ചിറങ്ങി വരുന്നതിന്റെ കൂടെ വരുന്ന മണ്ണ് വാരി കൂട് നിറച്ച് റബ്ബര്‍ തൈ നടണം. അതാണ് ജോലി. ഒരു കൂടിന് 40 പൈസ വീതം കിട്ടും. ഒരു ദിവസം പത്ത് കൂടൊക്കെ നിറയ്ക്കാന്‍ പറ്റും...''