'ഓര്‍മ്മയില്‍ എന്നും' ഷൂട്ടിങ് പുരോഗമിക്കുന്നു

എം.ജെ. ഫിലിംസിന്റെ ബാനറില്‍ കെ.എന്‍. ബൈജു കഥ, തിരക്കഥ, സംഭാഷണം, ക്യാമറ, മ്യൂസിക്, എഡിറ്റിങ് എന്നിവ നിര്‍വഹിച്ച് സംവിധാനം ചെയ്യുന്ന  ചിത്രമാണ് 'ഓര്‍മ്മയില്‍ എന്നും'.
ചിത്രത്തിന്റെ ഷൂട്ടിങ് കോട്ടയത്തും പരിസര പ്രദേശങ്ങളിലും നടന്നുകൊണ്ടിരിക്കുന്നു.

യു.എസ്. സിറ്റിസനായ ഗോപീകൃഷ്ണന്‍ റിട്ടയര്‍ ജീവിതത്തിനിടയില്‍ തന്റെ പ്രിയ സുഹൃത്തായ തോമസിനെ കാണാന്‍ നാട്ടിലെത്തുന്നു. പരമ്പരാഗത കൃഷിക്കാരനായ തോമസ് തുടര്‍ച്ചയായി സംഭവിച്ചു കൊണ്ടിരിക്കുന്ന കൃഷി നാശത്താലും മറ്റും ഭീമമായ നഷ്ടം സംഭവിച്ച് കടക്കെണിയിലകപ്പെട്ട് നട്ടം തിരിയുകയാണ്.

അയാളുടെ ദുഃഖങ്ങളുടെ തീഷ്ണതയില്‍ ഒരു താങ്ങായി നില്‍ക്കുന്നത് ഭാര്യ ത്രേസ്യമ്മയും കൊച്ചുമകള്‍ ആമിയുമാണ്. ഗോപീകൃഷ്ണന്റെ വരവോടെ തോമസിന് ഒരു വലിയ ആശ്വാസമാകുകയും അവരുടെ ബാല്യകാല സൗഹൃദം ഒന്നു കൂടെ അരക്കിട്ട് ഉറപ്പിക്കുകയും ചെയ്യുന്നു.

ഒരിക്കല്‍ ഗോപീകൃഷ്ണന് ആ നാടും കൂട്ടുകാരും താന്‍ പഠിച്ച കോളേജുമൊക്കെ  ഒഴിച്ചുകൂടാന്‍ പറ്റാത്ത ഒന്നായിരുന്നു. ദൗര്‍ഭാഗ്യകരമായ ചില സംഭവങ്ങള്‍ കാരണം അയ്യാള്‍ക്ക് നാടുവിടേണ്ടി വന്നു. തന്റെ ഭൂതകാലത്ത് സംഭവിച്ച കയ്‌പ്പേറിയ യാതനകളുടെ കണക്കു പുസ്തകവും കൈയിലേന്തി ഒരു തീക്കനലായി തോമസിന്റെ വീട്ടിലെത്തുന്ന ഗോപീകൃഷ്ണന്റെ ഉദ്വേഗജനകമായ മുഹൂര്‍ത്തങ്ങളിലൂടെ സസ്‌പെന്‍സും ത്രില്ലറും പ്രണയവും ഇടകലര്‍ന്ന് 'ഓര്‍മ്മയില്‍ എന്നും' എന്ന ചിത്രം കടന്നു പോകുന്നു.

ഇതില്‍ ഗോപീകൃഷ്ണനായി എം.ജെ. ജേക്കബും തോമസായി നാകു കോടിമതയും അഭിനയിക്കുന്നു. അഞ്ച് ഭാഷകളിലായി ഒരുങ്ങുന്ന ബനാറസി ബാബു എന്ന ചിത്രത്തില്‍ വളരെ പ്രാധാന്യമായ വേഷം കൈകാര്യം ചെയ്യുന്ന ബോംബെ നിവാസിയായ ബാലതാരം ഹെയ്‌സല്‍ ആമിയായി അഭിനയിക്കുന്നു.

കൂടാതെ സലാം കുന്നത്തൂര്‍, സലാമുദ്ദീന്‍ വര്‍ക്കല, ഇര്‍ഷാദ് അലി, അന്‍സാരി കോട്ടയം, ജിസ്മി ജോണ്‍, മിനി സുരേഷ്, ജിന്‍സി ചിന്നപ്പന്‍, നയന, നിമിഷ ശ്രീകുമാര്‍ തുടങ്ങിയവരും അഭിനയിക്കുന്നു.

കഥ, തിരക്കഥ, സംഭാഷണം, മ്യൂസിക്, ക്യാമറ,സംവിധാനം: കെ.എന്‍. ബൈജു. നിര്‍മ്മാണം: എം.ജെ. ജേക്കബ് മാമ്പറ. എക്‌സിക്യൂട്ടീവ് പ്രൊഡ്യൂസര്‍: നാരായണന്‍കുട്ടി. ഗാനങ്ങള്‍: രാജീവ് ആലുങ്കല്‍. ആലാപനം: ബിജു നാരായണന്‍, മധു ബാലകൃഷ്ണന്‍. മേക്കപ്പ്: സെയ്തലവി മണ്ണാര്‍ക്കാട്. ആര്‍ട്ട് എസ്സ് കെ, അരുണ്‍ എസ്സ് കല്യാണി. കോസ്റ്റ്യൂംസ്: തംബുരു. സ്റ്റില്‍സ്: പ്രശാന്ത് ശ്രെയ. പ്രൊഡക്ഷന്‍ എക്‌സിക്യൂട്ടീവ്: ശ്രീകുമാര്‍. മെസ്സ്: റിയാസ് പാളാന്തോടന്‍. യൂണിറ്റ് ഔട്ട് ഡോര്‍: അദിസ് സിനി ലൈറ്റ്‌സ്. ക്യാമറ യൂണിറ്റ്: ക്യാന്റീസ് ക്യാമറ. പി.ആര്‍.ഒ. ഷെജിന്‍ ആലപ്പുഴ.