മകള്‍ ജനിക്കുന്ന സമയത്ത് മണിച്ചേട്ടന്‍ അടുത്തുണ്ടായിരുന്നില്ല, ആ സമയത്ത് ഭര്‍ത്താവിന്റെ സാമീപ്യം ഏതൊരു സ്ത്രീയും ആഗ്രഹിക്കും, ഡെലിവറിക്ക് കയറ്റിയപ്പോഴും എനിക്ക് വല്ലാത്ത വിഷമമായിരുന്നു; കലാഭവന്‍ മണിയുടെ ഓര്‍മകള്‍ പങ്കുവച്ച് ഭര്യ നിമ്മി

മലയാളികളുടെ പ്രിയപ്പെട്ട നടന്‍ കലാഭവന്‍ മണിയുടെ ഓര്‍മയില്‍ ഭാര്യ നിമ്മി. ഒരു യൂട്യൂബ് ചാനലിലാണ് നിമ്മി ഓര്‍മകള്‍ പങ്കുവയ്ക്കുന്നത്. 

''മകള്‍ ജനിക്കുന്ന സമയത്ത് എന്നെ ആശുപത്രിയില്‍ കൊണ്ടുപോകുമ്പോള്‍ മണിച്ചേട്ടന്‍ എന്റെ അടുത്തുണ്ടായിരുന്നില്ല. ആ സമയത്ത് ഭര്‍ത്താവിന്റെ സാമീപ്യം ഏതൊരു സ്ത്രീയും ആഗ്രഹിക്കും. 

അന്നൊരു അവാര്‍ഡ് നിശ നടക്കുന്നുണ്ടായിരുന്നു. ഞാന്‍ പോയ്‌ക്കോട്ടെ, വയ്യായ്ക എന്തെങ്കിലുമുണ്ടെങ്കില്‍ ഞാന്‍ പോകുന്നില്ലെന്ന് പരിപാടിക്ക് പോകുന്നതിന് മുമ്പ് പറഞ്ഞിരുന്നു. 

എനിക്കപ്പോള്‍ ക്ഷീണവും തളര്‍ച്ചയൊന്നുമില്ലായിരുന്നു. മണിച്ചേട്ടന്‍ അന്ന് പരിപാടിയുടെ അവതാരകനായിരുന്നു. അത്രയും വലിയ പരിപാടി ഞാന്‍ കാരണം മുടക്കേണ്ടെന്ന് കരുതി പോയ്‌ക്കോളാന്‍ പറഞ്ഞു.

വൈകിട്ടാണ് എനിക്ക് വേദന തുടങ്ങിയത്. ആ സമയത്ത് മണിച്ചേട്ടനെ വിളിച്ചപ്പോള്‍ കിട്ടിയില്ല. ഡെലിവറിക്ക് കയറ്റിയപ്പോഴും എനിക്ക് വല്ലാത്ത വിഷമമായിരുന്നു. മോള്‍ ജനിച്ച വിവരം ആ സമയം മണിച്ചേട്ടന്‍ അറിഞ്ഞിട്ടില്ല. ലോഹിതദാസ് സാറാണ് അദ്ദേഹത്തോട് പറഞ്ഞത്.

എനിക്ക് ഓര്‍മ പോയപ്പോഴും ഓര്‍മ വന്നപ്പോഴും മോളേക്കാള്‍ കൂടുതല്‍ മണിച്ചേട്ടന്‍ വന്നോയെന്നാണ് ഞാന്‍ തിരക്കിയത്. മണിച്ചേട്ടന്‍ വന്നപ്പോള്‍ രണ്ട് മണിയായി. ഓടിവന്ന് എന്നെയും മോളെയും കണ്ടു. മണിച്ചേട്ടനും വല്ലാതെ ഫീല്‍ ചെയ്തു. 

കുറേ ദിവസം ഷൂട്ടിങ്ങും കാര്യങ്ങളും ക്യാന്‍സല്‍ ചെയ്ത് എന്റെയടുത്ത് ഇരുന്നിരുന്നു. എന്നിട്ടും ഇങ്ങനെയൊരു സാഹചര്യത്തില്‍ ആള്‍ക്ക് വരാന്‍ പറ്റാത്തതില്‍ വല്ലാത്ത വിഷമമായി...''