കര്‍മ്മം ബൂമറാങ് പോലെയാണ്, അത് ചെയ്തവരിലേക്ക് തന്നെ തിരിച്ചെത്തും, നാളെ, തലയുയര്‍ത്തി നില്‍ക്കാന്‍ ആര്‍ക്കൊക്കെ കഴിയും എന്ന് കാലം തെളിയിക്കും: ഷമ്മി തിലകന്‍

കര്‍മ്മം ബൂമറാങ് പോലെയാണെന്നും, അത് ചെയ്തവരിലേക്ക് തന്നെ തിരിച്ചെത്തുമെന്നും അമ്മ സംഘടനയുടെ തെരഞ്ഞെടുപ്പ് വിഷയത്തില്‍ പ്രതികരിച്ച് നടന്‍ ഷമ്മി തിലകന്‍. 

നിഷ്‌കളങ്കമായ ചിരിക്ക് പിന്നില്‍ വലിയ സത്യങ്ങളുണ്ടാകുമെന്ന ഓര്‍മപ്പെടുത്തല്‍ കൂടി ഉള്‍പ്പെടുത്തിയാണ് ഷമ്മി തിലകന്‍ തന്റെ കുറിപ്പ് പങ്കുവച്ചിരിക്കുന്നത്.

ഫെയ്‌സ്ബുക്ക് കുറിപ്പിങ്ങനെ: 

''അമ്മ സംഘടനയുടെ തെരഞ്ഞെടുപ്പ് വിശേഷങ്ങള്‍ കേള്‍ക്കുമ്പോള്‍, സത്യം പറഞ്ഞാല്‍ ചിരി വരുന്നു..! ചില കാര്യങ്ങളില്‍ പ്രതികരിച്ചാല്‍ പിന്നെ മുഖം 'നഷ്ടപ്പെടുന്ന' അവസ്ഥയാകും! അതുകൊണ്ടീ വിഷയത്തില്‍..; 'ഞാനീ നാട്ടുകാരനേയല്ല' എനിക്കൊന്നും പറയാനുമില്ല!

പക്ഷേ, ഒരു കാര്യം ഉറപ്പ്.. 'കര്‍മ്മം ഒരു ബൂമറാങ് പോലെയാണ്, അത് ചെയ്തവരിലേക്ക് തന്നെ തിരിച്ചെത്തും!' ബൈബിള്‍ പറയുന്നു: 'നിങ്ങള്‍ മറ്റുള്ളവരോട് എങ്ങനെ പെരുമാറുന്നുവോ, അതുപോലെ നിങ്ങളോടും പെരുമാറപ്പെടും..'' (മത്തായി 7:2)

ഈ തെരഞ്ഞെടുപ്പ് ഒരു പാഠപുസ്തകമാണ്. ഓരോ നീക്കവും, ഓരോ വാക്കും, ഓരോ തീരുമാനവും ചരിത്രത്തില്‍ രേഖപ്പെടുത്തപ്പെടും. നാളെ, തലയുയര്‍ത്തി നില്‍ക്കാന്‍ ആര്‍ക്കൊക്കെ കഴിയും എന്ന് കാലം തെളിയിക്കും. ചിലപ്പോള്‍, ചിരിപ്പിക്കുന്ന കാര്യങ്ങള്‍ പോലും പിന്നീട് ചിന്തിപ്പിക്കുന്നതാകാം. ഓര്‍ക്കുക, നിഷ്‌കളങ്കമായ ചിരിക്ക് പിന്നില്‍ വലിയ സത്യങ്ങളുണ്ടാകാം!..''