/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/YHgwJ8teJ7QaBDRGrAyr.jpg)
നിമിഷ സജയന്‍, റോഷന്‍ മാത്യു എന്നിവര്‍ പ്രധാന കഥാപാത്രങ്ങളാകുന്ന വെബ് പ്രൈം സീരീസാണ് 'പോച്ചര്‍'. ചിത്രത്തിന്റെ ട്രെയ്‌ലര്‍ ഇന്നലെ അണിയറപ്രവര്‍ത്തകര്‍ പുറത്തു വിട്ടു. സീരീസിന്റെ കഥ കേള്‍ക്കുമ്പോള്‍ പൂര്‍ണ ഗര്‍ഭിണി ആയിരുനെന്നും, സീരിസിന്റെ ഭാഗമാകാന്‍ റിച്ചി മേത്തയോട് താന്‍ ആവശ്യപ്പെടുകയായിരുന്നെന്നും ബോളിവുഡ് താരം ആലിയ ഭട്ട് പറഞ്ഞു. ട്രെയിലര്‍ ലോഞ്ചിലാണ് ആലിയ ഇക്കാര്യം വ്യക്തമാക്കിയത്. പരമ്പരയുടെ എക്‌സിക്യൂട്ടീവ് പ്രൊഡ്യൂസര്‍ ആണ് ആലിയ ഭട്ട്.
'പൂര്‍ണ ഗര്‍ഭിണി ആയിരുന്നപ്പോഴാണ് കഥ കേള്‍ക്കുന്നത്. അന്ന് സൂര്യന് താഴെയുള്ള എല്ലാത്തിനെ കുറിച്ചും സംസാരിച്ചിരുന്നു. കഥ കേട്ട് കഴിഞ്ഞപ്പോള്‍ എനിക് ഈ സീരിസിന് വേണ്ടി എന്തേലും ചെയ്യണമെന്ന് തോന്നി. റിച്ചി മേത്തയോട് അങ്ങോട്ട് ആവശ്യപ്പെടുകയായിരുന്നു ഭാഗമാകാന്‍. വളരെ റിയലിസ്റ്റിക് ആയാണ് സീരീസിന്റെ ചിത്രീകരണം. വീണ്ടും വീണ്ടും കാണണം എന്ന് തോന്നും. ചിത്രത്തില്‍ നിമിഷ സജയന്റെ അഭിനയം അതിഗംഭീരമാണ്. റോഷന്‍ മാത്യുവും നന്നായി അഭിനയിച്ചു' ആലിയ പറഞ്ഞു.
ഇന്ത്യന്‍ ചരിത്രത്തിലെ ഏറ്റവും വലിയ ആനക്കൊമ്പ് വേട്ടയടക്കം കേരളത്തിലെ വനങ്ങളില്‍ വന്യജീവികളെ ഇരയാക്കി നടത്തിയ ക്രൂര കുറ്റകൃത്യങ്ങളുടെയും അതിനെ തടയാന്‍ ഒരുകൂട്ടം ഉദ്യോഗസ്ഥര്‍ നടത്തുന്ന ജീവന്‍ മരണ പോരട്ടത്തിന്റെ കഥയാണ് 'പോച്ചര്‍' പറയുന്നത്. എമ്മി അവാര്‍ഡ് ജേതാവായ ചലച്ചിത്ര നിര്‍മ്മാതാവ് റിച്ചി മേത്തയാണ് പോച്ചറിന്റെ തിരക്കഥയും സംവിധാനവും നിര്‍വ്വഹിച്ചിരിക്കുന്നത്.
ദിബ്യേന്ദു ഭട്ടാചാര്യയും പരമ്പരയില്‍ പ്രധാന കഥാപാത്രമായെത്തുന്നു. ജോര്‍ദാന്‍ പീലെയുടെ 'ഗെറ്റ് ഔട്ട്', 'സ്‌പൈക്ക് ലീ'യുടെ 'ബ്ലാക്ക്ക്ലാന്‍സ്മാന്‍' തുടങ്ങിയ ഫീച്ചര്‍ ഫിലിം ഹിറ്റുകള്‍ സമ്മാനിച്ച ഓസ്‌കര്‍ ജേതാവായ പ്രൊഡക്ഷന്‍ ആന്‍ഡ് ഫിനാന്‍സ് കമ്പനിയായ ക്യുസി എന്റര്‍ടൈന്‍മെന്റ് ആണ് പോച്ചര്‍ നിര്‍മ്മിക്കുന്നത്.
യഥാര്‍ത്ഥ സംഭവങ്ങളെ അടിസ്ഥാനമാക്കിയുള്ള പരമ്പര എട്ട് ഭാഗങ്ങളായാണ് എത്തുന്നത്. ഫെബ്രുവരി 23 മുതല്‍ ഇന്ത്യയിലും ലോകമെമ്പാടുമുള്ള 240-ലധികം രാജ്യങ്ങളിലും പ്രൈം വീഡിയോയിലൂടെ സീരീസ് ആസ്വദിക്കാനാകും. ഇംഗ്ലീഷ്, തമിഴ്, തെലുങ്ക്, കന്നഡ, ഹിന്ദി ഭാഷകളിലും ലഭ്യമാകും. ഒപ്പം 35-ലധികം ഭാഷകളില്‍ സബ്ടൈറ്റിലുകളുമുണ്ടായിരിക്കും.