സിനിമയിൽ ഒരുപാട് അധിക്ഷേപങ്ങൾ കേട്ടു, രഞ്ജിത്ത് മിടുക്കനാണ്: പ്രതികരിച്ച് ഭീമൻ രഘു

ചലച്ചിത്ര അക്കാദമി ചെയര്‍മാനും സംവിധായകനുമായ രഞ്ജിത്തിന്റെ പുതിയ അഭിമുഖം സോഷ്യല്‍ മീഡിയയില്‍ വിവാദമാവുകയാണ്. ഇപ്പോഴിതാ തനിക്കെതിരെ നടത്തിയ പരാമര്‍ശത്തോട് പ്രതികരിച്ച് എത്തിയിരിക്കുകയാണ് നടന്‍ ഭീമന്‍ രഘു. സിനിമയില്‍ ഒരുപാട് അധിക്ഷേപങ്ങള്‍ അനുഭവിച്ചതാണ്. അതുകൊണ്ട് ഇപ്പോള്‍ ഇവയൊന്നും വലിയ കാര്യമായി തോന്നുന്നില്ലെന്ന് ഭീമന്‍ രഘു പറഞ്ഞു. 

'രഞ്ജിത്ത് എന്തുകൊണ്ടാണ് അങ്ങനെ പറഞ്ഞതെന്ന് എനിക്ക് അറിയില്ല. രഞ്ജിത്തിനെ കുറിച്ച് എനിക്ക് നല്ല അഭിപ്രായമാണ്. മിടുക്കനാണ്. എന്നാല്‍ എന്നെ കുറിച്ച് എന്താണ് അദ്ദേഹത്തിന്റെ വിലയിരുത്തല്‍ എന്നറിയില്ല. അദ്ദേഹം പറയുന്നത് അദ്ദേഹത്തിന്റെ ഇഷ്ടമാണ്' ഭീമന്‍ രഘു പറഞ്ഞു. തങ്ങള്‍ ഒക്കെ കളിയാക്കി കൊല്ലാറുള്ള ഒരു മണ്ടനാണ് ഭീമന്‍ രഘു എന്നാണ് രഞ്ജിത്ത് പറഞ്ഞത്.

രഞ്ജിത്തിന്റെ വാക്കുകള്‍ ഇങ്ങനെ

'ക്യാമറക്കുമുന്നില്‍ ഈ രണ്ടെണ്ണത്തിനോടും മുട്ടാന്‍ നല്ല രസമാണ്'... 
''ഭീമന്‍ രഘു എഴുന്നേറ്റ് നിന്ന ഭാഗത്തേക്കേ മുഖ്യമന്ത്രി നോക്കിയില്ല, അതില്‍ അദ്ദേഹത്തോട് ബഹുമാനമുണ്ടെന്ന് രഞ്ജിത് പറയുന്നു. 'രഘൂ അവിടെ ഇരിക്കൂ' എന്ന് ഇദ്ദേഹം പറഞ്ഞാല്‍ അവന്‍ ആളായി, അങ്ങനെ പുള്ളി ആരെയും ആളാക്കില്ല. 'പണ്ടേ അവന്‍ (ഭീമന്‍ രഘു) ഒരു കോമാളിയാണ്, മസില്‍ ഉണ്ടെന്നേ ഉള്ളൂ, ഞങ്ങള്‍ എത്രകാലമായി കളിയാക്കി കൊല്ലുന്ന ഒരാളാണ്. ആളൊരു മണ്ടന്‍ ആണ്.

നമ്മുടെ ഒരു സുഹൃത്ത് ഒരിക്കല്‍ പറഞ്ഞു, രഘൂ നിങ്ങളെ ശക്തികൊണ്ടും ബുദ്ധികൊണ്ടും കീഴ്പ്പെടുത്താന്‍ ആര്‍ക്കും ആകില്ലെന്ന്. ശക്തികൊണ്ട് ആകില്ല, ബുദ്ധികൊണ്ട് എങ്ങനെ ആണെന്ന് മനസിലായില്ല എന്ന് അവന്‍ മറുപടി നല്‍കി. ഉടനെ നമ്മുടെ സുഹൃത്തു പറഞ്ഞു, ഞാന്‍ ഇത് തമാശ പറഞ്ഞതാണെന്ന് നിനക്ക് മനസിലായില്ലല്ലോ എന്ന്. അതുപോലും പുള്ളിക്ക് മനസിലായില്ല എന്നതാണ്,' രഞ്ജിത്ത് പറയുന്നു.