സംവിധായകൻ വേണുഗോപൻ അന്തരിച്ചു

ചേര്‍ത്തല: ചലച്ചിത്ര സംവിധായകൻ  വേണുഗോപൻ  (67) അന്തരിച്ചു. അർബുദ ബാധിതനായി ചികിത്സയിലായിരുന്നു  സംവിധായകൻ പി. പദ്മരാജന്റെ കൂടെ ദീർഘകാലം സഹ സംവിധായകൻ ആയി പ്രവർത്തിച്ചു. 1995ൽ ആദ്യമായി കുസൃതി കുറുപ്പ്‌ സംവിധാനം ചെയ്തു. ഷാർജ ടു ഷാർജ, ചൂണ്ട, സ്വർണം, റിപ്പോർട്ടർ, സർവോപരി പാലക്കാരൻ എന്നിവയാണ് പ്രധാന ചിത്രങ്ങൾ.

എ കെ സാജനും എ കെ സന്തോഷും രചന നിർവ്വഹിച്ച്  2001ല്‍ പ്രദര്‍ശനത്തിനെത്തിയ ഷാര്‍ജ ടു ഷാര്‍ജ എന്ന ചിത്രത്തില്‍ ജയറാം, ഐശ്വര്യ, എം എന്‍ നമ്പ്യാര്‍ എന്നിവരാണ് പ്രധാന കഥപാത്രങ്ങളെ അവതരിപ്പിച്ചത്. 

2015ല്‍ പ്രദര്‍ശനത്തിനെത്തിയ ദി റിപ്പോര്‍ട്ടര്‍ എന്ന ചിത്രത്തില്‍ അനന്യ, കൈലാഷ്, മധുപാല്‍, അഭിനയ, സമുദ്രക്കനി എന്നിവരാണ് പ്രധാന കഥാപാത്രങ്ങളെ അവതരിപ്പിച്ചത്. ഇന്‍വെസ്റ്റിഗോഷന്‍ ത്രില്ലര്‍ വിഭാഗത്തില്‍പെടുന്ന ചിത്രം ഒരു പെണ്‍കുട്ടിയുടെ കൊലപാതകത്തെ ചുറ്റിപറ്റിയുള്ള അന്വേഷണമാണ് അവതരിപ്പിച്ചത്.

 2017ല്‍ പ്രദര്‍ശനത്തിനെത്തിയ സര്‍വോപരി പാലാക്കാരനില്‍ അനുപ് മേനോന്‍, അപര്‍ണ ബാലമുരളി എന്നിവരാണ് പ്രധാന അഭിനേതാക്കള്‍. ചുംബന സമരത്തിന്റെ പശ്ചാത്തലത്തിലുള്ള ആക്ഷേപഹാസ്യമാണ് ചിത്രം പറയുന്നത്. ചിത്രത്തിന്റെ തിരക്കഥയൊരുക്കിയിരിക്കുന്നത് പി എസ് സുരേഷ് ബാബു ആണ്.

ഭാര്യ: ലത വേണു. മക്കൾ : ലക്ഷ്മി (NISH തിരുവനന്തപുരം), വിഷ്ണു ഗോപൻ (എഞ്ചിനീയർ FISCHER ), മരുമകൻ രവീഷ്.