രോമാഞ്ചത്തിന്റെ രണ്ടാം ഭാ​ഗം ഉണ്ടാകും; എപ്പോൾ വരുമെന്ന് ഇപ്പോൾ പറയാൻ കഴിയില്ല: ജിത്തു മാധവൻ

രോമാഞ്ചത്തിന്റെ രണ്ടാം ഭാ​ഗം ഉണ്ടാകുമെന്ന് സംവിധായകൻ ജിത്തു മാധവൻ. ചെറിയൊരു ഐഡിയ മനസിലുണ്ടെന്നും എങ്ങനെ എഴുതി തുടങ്ങണമെന്ന് അറിയില്ലെന്നും സംവിധായകൻ പറഞ്ഞു. രണ്ടാമത്തെ ചിത്രമായ ആവേശത്തിന്റെ പ്രമോഷൻ പരിപാടിക്കിടയിലായിരുന്നു രോമഞ്ചത്തെക്കുറിച്ച് ജിത്തു പറഞ്ഞത്.

‘രോമാഞ്ചത്തിന്റെ രണ്ടാം ഭാ​ഗം ഉണ്ടാകേണ്ടതാണ്. എപ്പോഴാണെന്നൊന്നും അറിയില്ല. പക്ഷെ, ഉണ്ടാകും. സിനിമയെക്കുറിച്ചൊന്നും വലുതായിട്ട് പ്ലാൻ ചെയ്തിട്ടില്ല. രോമാഞ്ചത്തിന്റെ സെക്കൻഡ് പാർട്ടിനെ കുറിച്ച് ഒരു ഐഡിയ ഉണ്ട്. ഐഡിയ മാത്രം ഉണ്ടായിട്ട് കാര്യമില്ലലോ… അതിനെ നല്ലൊരു സ്‌ക്രിപ്റ്റിന്റെ രൂപത്തിലേക്ക് മാറ്റണം.

എന്തായാലും സമയമെടുക്കും. സമയമെടുത്ത് ചെയ്യുന്നതാണ് നല്ലത്. വെറുതെ ഒരു സെക്കൻഡ് പാർട്ട് ചെയ്തിട്ട് കാര്യമില്ലലോ..

എപ്പോള്‍ വരുമെന്ന് ഇപ്പോള്‍ പറയാന്‍ കഴിയില്ല. സെക്കന്റ് പാര്‍ട്ട് ഇതിനെക്കാള്‍ മേലെ നില്‍ക്കുന്ന ഒന്നാവണം എന്നാണല്ലോ നമ്മുടെ ആഗ്രഹം. സമയമാകുമ്പോള്‍ എല്ലാം നടക്കുമെന്നാണ് കരുതുന്നത്.’-ജിത്തു മാധവൻ പറഞ്ഞു.

2023-ൽ ഇറങ്ങിയ രോമാഞ്ചം ആയിരുന്നു ജിത്തു മാധവന്റെ ആദ്യ ചിത്രം. സൗബിന്‍ ഷാഹിര്‍, അര്‍ജുന്‍ അശോകന്‍, സജിന്‍ ഗോപു, സിജു സണ്ണി, അബിന്‍ ബിനോ തുടങ്ങിയവരായിരുന്നു ചിത്രത്തില്‍ പ്രധാന വേഷങ്ങളില്‍ എത്തിയത്. ഹൊറർ കോമഡി ജോണറിലിറങ്ങിയ ചിത്രമായിരുന്നു രോമാഞ്ചം.