ഞാൻ കാണിച്ചിട്ടുള്ള തോന്ന്യാസങ്ങൾ വെച്ച് എനിക്ക് മീനാക്ഷിയെ ഉപദേശിക്കാനാവില്ല: ദിലീപ്

മലയാളത്തില്‍ ഏറെ ആരാധകരുള്ള താരപുത്രിയാണ് മീനാക്ഷി ദിലീപ്. അച്ഛന്‍ ദിലീപിനെയും അമ്മ മഞ്ജു വാര്യരെയും പോലെത്തന്നെ മീനൂട്ടിയെന്നുവിളിക്കുന്ന മീനാക്ഷിയും ഒരു കൊച്ചു സെലബ്രിറ്റിയാണ്. മീനാക്ഷിയുടെ വിശേഷങ്ങളും സോഷ്യല്‍ മീഡിയ ഇരുകയ്യും നീട്ടിയാണ് സ്വീകരിക്കുന്നത്. ഭാവിയില്‍ സിനിമയിലേത്തിയേക്കുമെന്ന തരത്തില്‍ നേരത്തെ ആരാധകര്‍ വിലയിരുത്തിയ താരപുത്രിയാണ് മീനാക്ഷി. പിന്നാലെ സിനിമയിലേക്ക് താനില്ലെന്ന് വ്യക്തമാക്കിയ മീനാക്ഷി എംബിബിഎസിന് ചേരുകയായിരുന്നു. കുടുംബത്തോടൊപ്പം സെലിബ്രിറ്റികളുടെ ചടങ്ങിലെല്ലാം മീനാക്ഷി സ്ഥിരം സാന്നിധ്യമാണ്.

ഇപ്പോഴിതാ ബാന്ദ്ര സിനിമയുടെ പ്രമോഷനുമായി ബന്ധപ്പെട്ട് മിര്‍ച്ചി മലയാളത്തിന് നല്‍കിയ അഭിമുഖത്തില്‍ മീനാക്ഷിയെ കുറിച്ച് ദിലീപ് പറഞ്ഞ കാര്യങ്ങളാണ് വൈറലാകുന്നത്. താന്‍ മകളെ ഉപദേശിക്കാറില്ലെന്നും അവളുടെ സുഹൃത്താണ് താനെന്നുമാണ് മീനാക്ഷിയെ കുറിച്ച് സംസാരിച്ച് ദിലീപ് പറഞ്ഞത്.

'എനിക്ക് മീനാക്ഷിക്ക് ഒരു ഉപദേശവും കൊടുക്കാനാവില്ല. ഞാന്‍ കാണിച്ചിട്ടുള്ള തോന്ന്യാസങ്ങള്‍ വെച്ച് എനിക്ക് മീനാക്ഷിയെ ഉപദേശിക്കാനാവില്ല. നമ്മുടെ കാര്യങ്ങളൊക്കെ ഇവിടുത്തെ ആള്‍ക്കാര്‍ക്കൊക്കെ അറിയാമല്ലോ. തെറ്റാണോ ശരിയാണോ എന്നത് പറയാറുണ്ട്. അങ്ങനെ ചെയ്യൂ... ഇങ്ങനെ ചെയ്യൂ... ഇയാളെ മാത്രമെ കല്യാണം കഴിക്കാവൂ എന്നൊന്നും എനിക്ക് പറയാനാവില്ല. ഞാന്‍ നിന്റെ ഫ്രണ്ടാണ് എന്നാണ് മീനാക്ഷിയോട് ഞാന്‍ പറഞ്ഞത്. നിനക്ക് എന്തും എന്നോട് പറയാമെന്നും പറഞ്ഞിട്ടുണ്ട്. ഇപ്പോഴത്തെ കാലത്തെ കുട്ടികളുടെ ചിന്താഗതികളൊക്കെ വേറെയാണ്. എന്റെ അച്ഛന് എന്നെ അഡ്വക്കേറ്റാക്കാനായിരുന്നു താല്‍പര്യം. പക്ഷെ ഞാന്‍ പോയത് വേറെ വഴിക്കല്ലേ. അവളിപ്പോള്‍ പഠിക്കുകയല്ലേ. മിസ്റ്റര്‍ ആന്റ് മിസിസ് എന്നതിന് അപ്പുറം ഒരു ഡിഗ്രി ഉണ്ടായി കഴിഞ്ഞാല്‍ പിന്നെ നിനക്ക് തീരുമാനിക്കാം എന്നാണ് പറഞ്ഞത്', എന്നാണ് ദിലീപ് പറഞ്ഞത്. 

ദിലീപിന്റെ ബാന്ദ്ര എന്ന സിനിമയ്ക്ക് സമ്മിശ്ര പ്രതികരണമാണ് ലഭിക്കുന്നത്. തമന്നയാണ് ചിത്രത്തില്‍ നായിക. അരുണ്‍ ഗോപി രാമലീലയ്ക്ക് ശേഷം സംവിധാനം ചെയ്ത സിനിമ കൂടിയാണ് ബാന്ദ്ര.