ഏകലവ്യന്‍ ചിത്രീകരണത്തിനിടെ ക്യാമറ വീണ് ലെന്‍സ് പൊട്ടി. എല്ലാവരും അന്ധവിശ്വാസങ്ങള്‍ പ്രചരിപ്പിച്ചു, മറുപടിയായി പിറന്നത് സൂപ്പര്‍ ഹിറ്റ്: ഷാജി കൈലാസ്

സുരേഷ് ഗോപി-രണ്‍ജി പണിക്കര്‍-ഷാജി കൈലാസ് കൂട്ടുകെട്ടില്‍ പിറന്ന സൂപ്പര്‍ ഹിറ്റ് ചിത്രമാണ് ഏകലവ്യന്‍. ചിത്രത്തിന്റെ ഷൂട്ടിങ് സമയത്തെ ചില സംഭവങ്ങള്‍ ഓര്‍ത്തെടുക്കുകയാണ് സംവിധായകന്‍ ഷാജി കൈലാസ്. സംവിധായകന്റെ വാക്കുകള്‍:

'ഏകലവ്യന്റെ ലൊക്കേഷനില്‍ സുരേഷ് ഗോപി എത്തിയ ആദ്യദിവസം. തിരശീലകളെ തീ പിടിപ്പിച്ച ക്ഷുഭിതയൗവന പകര്‍ന്നാട്ടത്തിനായി സുരേഷ് ഗോപി ചായം പൂശുന്നു.

എല്ലാം കഴിഞ്ഞ് ആദ്യഷോട്ടിനായി വരുമ്പോഴാണ് ദുഃഖകരമായ സംഭവം നടന്നത്. ക്യാമറ നിലത്ത് വീണു. ലെന്‍സ് പൊട്ടിച്ചിതറി. സെറ്റ് മൂകമായി. സുരേഷിന്റെ കണ്ണുകളില്‍ നിരാശയുടെയും ദുഃഖത്തിന്റെയും അലയൊലി. ഞാന്‍ സുരേഷിനെ ആശ്വസിപ്പിച്ചു.
 
സ്റ്റില്‍ ഫോട്ടോഗ്രാഫറായ സുനില്‍ ഗുരുവായൂരിനെക്കൊണ്ട് മൂന്നു നാല് സ്റ്റില്ലുകള്‍ എടുപ്പിച്ചു. എന്നിട്ടാണ് സുരേഷ് ഗോപി മേക്കപ്പഴിച്ചത്. ഐശ്വര്യക്കേടിന്റെയും ദുര്‍നിമിത്തത്തിന്റെയും വ്യാഖ്യാനങ്ങള്‍ കൊണ്ടു വഷളാകുമായിരുന്ന ആ സംഭവം അങ്ങനെ ശാന്തമായി അവസാനിച്ചു.

ഏകലവ്യന്‍ പൂര്‍ത്തിയായി. സുരേഷ് ഗോപി സൂപ്പര്‍താരമായി. മൂന്ന് തവണയാണ് ഏകലവ്യന്റെ  വിജയാഘോഷം നടത്തിയത്. നൂറും നൂറ്റമ്പതും ഇരുന്നൂറ്റമ്പതും ദിനങ്ങള്‍ പൂര്‍ത്തിയായപ്പോള്‍ സുരേഷ് ഗോപിയോട് ആദ്യ ദിവസം ലൊക്കേഷനില്‍ നടന്ന സംഭവും ക്യാമറ വീഴ്ചയും ഞാന്‍ ഓര്‍മിപ്പിച്ചു. അപ്പോള്‍ സുരേഷ് ഗോപി ഹൃദ്യമായി ചിരിച്ചു...'