അമിതാവേശത്തിനു കടിഞ്ഞാണിടാൻ തെലുങ്കാന തിയേറ്ററുകൾ. പടക്കങ്ങൾക്ക് ഉൾപ്പടെ നിരോധനം

ഹൈദരാബാദ്: പുഷ്പ 2 പ്രീമിയറിനിടെ ഉണ്ടായ അപകടത്തിനു പിന്നാലെ ഇനിയൊരു അപകടം തിയറ്ററുകളിൽ ഉണ്ടാവാതിരിക്കാൻ വലിയ നിയന്ത്രണങ്ങൾ. രാം ചരൺ നായകനായി എത്തുന്ന ഗെയിം ചെയ്ഞ്ചറിന്റെ റിലീസിനോട് അനുബന്ധിച്ചാണ് പുതിയ മാറ്റങ്ങൾ നടത്താൻ തെലുങ്കാനയിലെ തീയേറ്റകൾ തീരുമാനിച്ചിരിക്കുന്നത്. 

പുലർച്ചെയുള്ള ഷോകളിൽ തിക്കും തിരക്കും ഉണ്ടാകാതിരിക്കാനുള്ള നടപടികളാണ് തിയറ്ററുകൾ സ്വീകരിച്ചത്. നിരയായി മാത്രമേ തിയറ്റർ കോമ്പൗണ്ടിലേക്ക് പ്രവേശനമുണ്ടാകൂ. കൂടാതെ ആഘോഷങ്ങളിലും നിയന്ത്രണമുണ്ട്. 

പടക്കം, ഹിറ്റ് സ്‌പ്രേകൾ, പോസ്റ്റർ ബോർഡുകൾ ഉൾപ്പടെയുള്ള വസ്തുക്കൾ തിയറ്ററിൽ കൊണ്ടുവരുന്നതിന് നിരോധനം ഏർപ്പെടുത്തിയിട്ടുണ്ട്.

ആന്ധ്രപ്രദേശ് തെലുങ്കാന തിയറ്ററുകളിൽ ഗെയിം ചെയ്ഞ്ചറിന് പുലർച്ചെയുള്ള ഷോ നടത്താൻ അനുമതി നൽകിയിരുന്നു. ടിക്കറ്റ് നിരക്കും വർധിപ്പിക്കാം. എന്നാൽ ഒരു മണിയ്ക്കുള്ള ഷോയ്ക്ക് സർക്കാർ അനുമതി നൽകിയില്ല. 

നാല് മണി മുതലാണ് പ്രദർശനം നടത്താനാവുക. ഒരു മാസം മുൻപാണ് അല്ലു അർജുൻ ചിത്രം പുഷ്പ 2ന്റെ പ്രീമിയർ റിലീസിനിടെ ദാരുണ അപകടമുണ്ടായത്. 

അല്ലു അർജുൻ തിയറ്ററിൽ എത്തിയതിനെ തുടർന്നുണ്ടായ തിരക്കിൽ രേവതി എന്ന 35കാരിക്ക് ജീവൻ നഷ്ടപ്പെടുകയായിരുന്നു. ഇവരുടെ മകൻ ശ്രീതേജിന് ഗുരുതരമായി പരിക്കേൽക്കുകയും ചെയ്തു.