പങ്കാളി ഇപ്പോൾ മറ്റൊരാളെ കണ്ടുപിടിച്ചു. ഞങ്ങൾ ഇപ്പോൾ പ്രൈമറി പാർട്ട്ണേഴ്സ് അല്ല, ആനന്ദ് എനിക്കിപ്പോള്‍ സഹോദരനെ പോലെ : കനി കുസൃതി

അഭിനയംകൊണ്ടും നിലപാടുകൊണ്ടും ഏറെ ശ്രദ്ധിക്കപ്പെട്ട നടിയാണ് കനി കുസൃതി. അഭിപ്രായങ്ങൾ വെട്ടിത്തുറന്നു പറയുന്ന താരം അതിന്റെ പേരിൽ സോഷ്യൽ മീഡിയയിൽ വിമർശനങ്ങളും നേരിടേണ്ടിവരാറുണ്ട്. അതിനാൽ തന്നെ കനിയുടെ അഭിമുഖങ്ങൾ പലപ്പോഴും ചർച്ചയാവാറുണ്ട്. ഇപ്പോഴിതാ പങ്കാളിയായ ആനന്ദ് ഗാന്ധിയെ കുറിച്ചും തന്റെ റിലേഷൻഷിപ്പിനെ കുറിച്ചും അതിൽ വന്ന മാറ്റത്തെ കുറിച്ചും തുറന്ന്  സംസാരിക്കുകയാണ് കനി കുസൃതി. 

ആനന്ദിന്റെ ഇന്റലിജൻസിനെയാണ് താൻ ആരാധിക്കുന്നതെന്ന് കനി മുൻപൊരിക്കൽ പറഞ്ഞിട്ടുണ്ട്. ഇപ്പോൾ ആനന്ദ് ഗാന്ധി മറ്റൊരു റിലേഷൻഷിപ്പിലേക്ക് കടന്നെന്നും അതിൽ താൻ സന്തോഷവതിയാണെന്നും പറയുകയാണ് കനി. ആനന്ദിനോട് ഇപ്പോഴും ആത്മബന്ധമുണ്ടെന്നും, അത് സഹോദരനോടുള്ള പോലെയുള്ള ആത്മബന്ധമാണ് ഉള്ളതെന്നും കനി വണ്ടർവാൾ മീഡിയക്ക് നല്കിയ അഭിമുഖത്തിൽ പറയുന്നു. 

കനി കുസൃതിയുടെ വാക്കുകൾ: 

“എപ്പോഴും ഓപ്പൺ റിലേഷൻഷിപ്പ് ഉള്ള ആളായിരുന്നു ഞാൻ. ഒരു പങ്കാളിയെ കണ്ടുപിടിച്ച് ഒന്നിച്ച് ജീവിക്കണം എന്ന് തോന്നിയിട്ടില്ല. കൂട്ടുകാരിയും അവളുടെ പാർട്ട്ണറും ഒരുമിച്ച് ജീവിക്കുന്നുണ്ടെങ്കിൽ, അവളുടെ വീട്ടിൽ കെട്ടാതെ പോയ ഒരു മകളെ പോലെ ജീവിക്കാനാണ് എനിക്കിഷ്ടം. ആ ഒരു ഫാമിലി ഫീലിങ്ങ് എനിക്കിഷ്ടമാണ്. എന്റെ ഭർത്താവ്, കുട്ടികൾ എന്നൊക്കെ പറയുന്നത് ഇഷ്ടമല്ല. എന്റെ സുഹൃത്തിനും പങ്കാളിക്കും കുട്ടികളുണ്ടെങ്കിൽ ഞാനവരെ വളർത്താൻ സഹായിക്കും. ആനന്ദിനെ പരിചയപ്പെട്ടപ്പോഴാണ് ഇത്രയും കണക്ഷൻ ഉള്ള ഒരാളെ കിട്ടിയാൽ ഇത് മതി, ഇവരോടൊപ്പം ജീവിക്കാം എന്ന്  തീരുമാനിച്ചത്.

ആനന്ദ് മോണോഗാമസ് ആയ വ്യക്തിയാണ്, പല പങ്കാളികൾ വേണമെന്ന് അവന് നിർബന്ധമില്ല. പക്ഷേ താൻ ഓപ്പൺ റിലേഷൻഷിപ്പ് ഇഷ്ടപ്പെടുന്ന ആളാണ്, അവന് പറ്റിയ  ഒരാളെ ആനന്ദ് കണ്ടുപിടിച്ചു. അവർ രണ്ടുപേരും മോണോഗാമസ് ആൾക്കാരാണ്. ഞങ്ങൾ ഇപ്പോൾ റൊമാന്റിക് പാര്ട്ണർമാരല്ല, പക്ഷേ ഇന്റിമസിയുണ്ട്. ഞങ്ങൾ ഫാമിലിയാണ്. രണ്ട് പേർ പാർട്ണർ ആയി ഇരിക്കുമ്പോഴുള്ള ഇന്റിമസി അതുപോലെ ഇപ്പോൾ വെക്കില്ല. അല്ലെങ്കിൽ ആ വരുന്ന പെൺകുട്ടിയും ആനന്ദും ഓപ്പൺ റിലേഷൻഷിപ്പിൽ ആയിരിക്കണം. പക്ഷേ അങ്ങനെയല്ല, അവർ രണ്ടുപേരുമാണ് പ്രൈമറി പാർട്ണർമാർ. ഞാനും ആനന്ദും ഇപ്പോൾ സഹോദരങ്ങളെ പോലെയാണ്.” കനി കുസൃതി പറഞ്ഞു.

2013 ൽ പുറത്തിറങ്ങിയ ‘ഷിപ്പ് ഓഫ് തെസ്യൂസ്’ എന്ന സിനിമയുടെ സംവിധായകനാണ് ആനന്ദ് ഗാന്ധി.  കൂടാതെ 2018 ൽ പുറത്തിറങ്ങിയ ‘തുംബാദ്'( Tumbaad) എന്ന സിനിമയിൽ ക്രിയേറ്റീവ് ഡയറക്ടറായും  എക്സിക്യൂടീവ് പ്രൊഡ്യൂസറും ആനന്ദ് ഗാന്ധി പ്രവർത്തിച്ചു.