അനിരുദ്ധ് സുഹൃത്ത് മാത്രം; വിവാഹ വാർത്തയിൽ ആദ്യമായി പ്രതികരിച്ച് കീർത്തി

തെന്നിന്ത്യയിൽ ഏറെ തിരക്കുള്ള നായികമാരിൽ ഒരാളാണ് കീർത്തി സുരേഷ്. തന്റേതായ സ്ഥാനം സിനിമാ മേഖലയിൽ ഉറപ്പിക്കാൻ കീർത്തിക്കായി. തമിഴകത്ത് ഹിറ്റുകൾ സമ്മാനിച്ച് ഇപ്പോൾ ബോളിവുഡ് വരെ എത്തിനിൽക്കുന്ന സംഗീത സംവിധായകനാണ് അനിരുദ്ധ് രവിചന്ദ്രൻ. അനിരുദ്ധും കീർത്തിയും തമ്മിലുള്ള സൗഹൃദം ഗോസിപ്പ് കോളങ്ങളിൽ ഇടംപിടിച്ചിരുന്നു.  ഇരുവരും വിവാഹിതരാകുമെന്ന ഗോസിപ്പുകളാണ് പ്രചരിച്ചത്. ഇപ്പോഴിതാ ഇത്തരം വാർത്തകളോട് ആദ്യമായി പ്രതികരിച്ച് എത്തിയിരിക്കുകയാണ് കീർത്തി സുരേഷ്. 

താനും അനിരുദ്ധും വിവാഹിതരാകുന്നു എന്ന തരത്തിൽ പ്രചരിക്കുന്ന വാർത്തയിൽ സത്യമില്ലെന്ന് കീർത്തി സുരേഷ് പറഞ്ഞു. അനിരുദ്ധ് തന്റെ നല്ല സുഹൃത്ത് മാത്രമാണ്. നടക്കേണ്ട സമയത്ത് വിവാഹം നടക്കുമെന്നും കീർത്തി സുരേഷ് ഒരു മാദ്ധ്യമത്തോട് പറഞ്ഞു. നേരത്തെ കീർത്തിയുടെ പിതാവും നിർമ്മാതാവുമായ ജി സുരേഷ് കുമാറും വിഷയത്തിൽ പ്രതികരിച്ചിരുന്നു.

യാതൊരു സത്യവും ഇല്ലാത്ത ഒരു വാർത്തയാണ് ഇതെന്നാണ് സുരേഷ് കുമാർ പറഞ്ഞത്. അതിൽ ഒരു സത്യവുമില്ല. ആ റിപ്പോർട്ട് തീർത്തും അടിസ്ഥാനരഹിതമാണ്. ഇങ്ങനെ മറ്റ് ചിലരുടെ പേരുകളുമായി ചേർത്തും റിപ്പോർട്ടുകൾ നേരത്തെ ഉണ്ടായിട്ടുണ്ട് എന്നും അനിരുദ്ധ് രവിചന്ദറിനെയും കീർത്തി സുരേഷിനെ കുറിച്ചും വാർത്തകൾ വരുന്നത് ഇത് ആദ്യമല്ലെന്നും ജി സുരേഷ് കുമാർ വ്യക്തമാക്കി.

ഇതിനു മുൻപും കീർത്തിയുടെ പ്രണയവും ,വിവാഹവുമെല്ലാം വാർത്തകളിൽ വന്നിട്ടുണ്ട്.വ്യവസായിയായ ഫർഹാനുമായി കീർത്തി പ്രണയത്തിലാണെന്നും വിവാഹം വൈകാതെയുണ്ടാകുമെന്നും അന്ന് ഗോസിപ്പുകൾ പ്രചരിച്ചിരുന്നു. എന്നാൽ സുഹൃത്തിനെ ഇതിലേക്ക് വലിച്ചിഴക്കേണ്ടെന്നായിരുന്നു അന്ന്  കീർത്തി പ്രതികരിച്ചത്.