നിക്കിന് ഇഷ്ടപ്പെട്ട തന്റെ ചിത്രം 'ദില്‍ ധഡക്നേ ദോ' ആണെന്ന് പ്രിയങ്ക ചോപ്ര; താരങ്ങള്‍ ദീപാവലി ആഘോഷിച്ചത് ലണ്ടനില്‍

ബോളിവുഡ് സൂപ്പർതാരം പ്രിയങ്ക ചോപ്ര, ഗായകൻ നിക്ക് ജോനാസുമായുള്ള വിവാഹശേഷം താരം അമേരിക്കയിലാണ് താമസം. 

താരദമ്പതികളുടെ ഇത്തവണത്തെ ദീപാവലി ആഘോഷം ലണ്ടനിലായിരുന്നു. ദീപാവലി ആഘോഷത്തിന്റെ ചിത്രങ്ങൾ ആരാധകർ ഏറ്റെടുത്തിരുന്നു. 

ബ്രിട്ടീഷ് വോഗുമായുള്ള അഭിമുഖത്തിൽ തന്റെ നാടിന്റെ പാരമ്പര്യത്തെക്കുറിച്ചും ദീപാവലിയുടെ പ്രാധാന്യത്തെക്കിറിച്ചും പ്രിയങ്ക സംസാരിച്ചു. സംഭാഷണങ്ങൾക്കിടയിൽ ഭർത്താവിന് ഇഷ്ടപ്പെട്ട തന്റെ ചിത്രത്തെക്കുറിച്ചും താരം പറഞ്ഞു.

തന്റെ സിനിമകളെക്കുറിച്ച് പരിചയമില്ലാത്ത ഒരാൾക്ക് ഏത് സിനിമയാണ് നിർദേശിക്കുക എന്ന ചോദ്യത്തിന് പ്രിയങ്കയുടെ മറുപടി ഇങ്ങനെയായിരുന്നു:  'ദിൽ ധഡക്നേ ദോ' ആണ് ഞാൻ കാണാൻ ആവശ്യപ്പെടുന്നത്. 

എന്റെ ഭർത്താവിനും ഈ ചിത്രം ഇഷ്ടമാണ്. അദ്ദേഹവും ഈ ചിത്രമായിരിക്കും ശിപാർശ ചെയ്യുന്നത്. നിക്ക് അധികം ബോളിവുഡ് ചിത്രങ്ങൾ കണ്ടിട്ടില്ല...' ഒരു പുഞ്ചിരിയോടെ പ്രിയങ്ക പറഞ്ഞു. 

'ദീപാവലി ഐക്യത്തിന്റെയും പ്രതീക്ഷയുടെയും പ്രതീകമാണ്. സുഹൃത്തുക്കളുടെയും കുടുംബങ്ങളുടെയും ഒത്തുചേരൽ കൂടിയാണ് ദീപങ്ങളുടെ മഹോത്സവം.

ഈ ഉത്സവം തിന്മയുടെ മേൽ നന്മയുടെ വിജയത്തെയാണ് പ്രതിനിധീകരിക്കുന്നത്. വിചിത്രമായ ഒരു ലോകത്ത്, ഇത് എനിക്ക് വളരെയധികം ആശ്വാസം നൽകുന്നു...' പ്രിയങ്ക കൂട്ടിച്ചേർത്തു. 

'എന്റെ വീട്ടിൽ വളരെ മനോഹരമായ ഒരു ക്ഷേത്രം ഉണ്ട്, ഞങ്ങൾ പൂജകൾ നടത്താറുണ്ട്, പ്രത്യേകിച്ച് ദീപാവലിക്ക്. എന്റെ ധാരാളം സുഹൃത്തുക്കൾ പൂജകൾക്കായി എന്നോടൊപ്പം ചേരാറുണ്ട്. 

എന്റെ സുഹൃത്തുക്കൾക്ക് ഇന്ത്യൻ വസ്ത്രങ്ങൾ സമ്മാനമായി നൽകുന്നത് പതിവാണ്...' താരം പറഞ്ഞു. 

ഹോളിവുഡ് ചിത്രങ്ങളായ ദി ബ്ലഫ്, ജഡ്ജ്‌മെന്റ് ഡേ എന്നിവയാണ് പ്രിയങ്കയുടെ പുതിയ പ്രോജക്ടുകൾ.