വധശിക്ഷ - ശരിയായൊരു ശിക്ഷയോ ?

ജീവൻ നിർമ്മിച്ചു നല്കീടാൻ

കഴിവില്ലാത്ത മാനവൻ

വധശിക്ഷ നടപ്പാക്കും

നീതിയെന്തൊരനീതിയാം ?

ശരിക്കും ശിക്ഷയാവുന്നി -

ല്ലിജ്ജാതി വധശിക്ഷകൾ

'ഉടൻ കൊല്ലി' പ്രയോഗങ്ങൾ

ശിക്ഷാമാതൃകയാവുമോ ?

കുറ്റബോധഫലം പശ്ചാ -

ത്താപവൈവശ്യവേദന

അതിരൂക്ഷം വെന്തുനീറാൻ

ശിക്ഷ സാഹായ്യമാവണം

കുറ്റവാളികളിൽ നിന്നു -

മുത്തമം പൗരനിർമ്മിതി

രാഷ്ട്രധർമ്മമതാണല്ലോ

കൊലയല്ലൊരു പോംവഴി

നീറിനീറിയുമിത്തീയിൽ

ഹൃദയം പാപചിന്തയിൽ

തല്ഫലം സംഭവിക്കേണം

മാനസാന്തരധീരത

നല്ലയാളായ് വളർത്താനും

സാവകാശം കൊടുക്കണം

കാരാഗൃഹമതിന്നുള്ള

പാഠശാലകളാവണം

അന്ത:കരണമാറ്റങ്ങൾ

സൃഷ്ടിക്കേണ്ടത് രാഷ്ട്രമാം

കുറ്റവാളികളിൽ നിന്നു -

മൃഷിമാരെ വളർത്തിടാം

യുഗാന്തരപരിഷ്കാര

ഫലമാം നമ്മളൊക്കെയും

സ്നേഹിക്ക പാപിയേ നമ്മൾ

ക്ഷമിക്കുക പൊറുക്കുക

പാപത്തെ അടിവേരോടെ -

യില്ലാതാക്കൂ ! വെറുക്കുക

പശ്ചാത്തലം പഠിച്ചിട്ടു -

നിർദ്ദേശം പരിഹാരവും

കാട്ടുകൊള്ളയിലാനന്ദം

തേടി രത്‌നാകരാഭിധൻ

മഹർഷിമുഖ്യരേപ്പോലും

കൊന്നൊടുക്കും നരാധമൻ

വധശിക്ഷ കൊടുത്തെങ്കി-

ലുണ്ടോ വാത്മീകിയാം കവി ?

തപസ്സാൽ മറ്റൊരാളാവാൻ

വഴികാട്ടീ മഹർഷിമാർ

നേർവഴിക്ക് നയിച്ചോരോ

പൗരനെയും വളർത്തുവാൻ

ബാധ്യതപ്പെട്ടതാം രാഷ്ട്രം

സംസ്കരിക്ക മനസിനെ

മനസംസ്കാരമാവേണ -

മതിനായേതു മാർഗ്ഗവും

അതായിരിക്കണം ശിക്ഷാ-

വിധികൾക്ക് നിയാമകം

മനുഷ്യപക്ഷം വാദിക്കും

ചിന്തകൾ നിയമജ്ഞരും

ആലോചന നടത്തേണ്ട -

തല്ലേയീ നരഹത്യകൾ