ഭീരു (കവിത)

- സി കെ രാജൻ കല്ലടിക്കോട്

ആരൊക്കെപ്പറഞ്ഞാലും ചേരില്ലീക്കിരീടമി-

ന്നാത്മ നിന്ദയാലെന്റെ ശിരസ്സു കുനിയുന്നു

മെയ്ക്കരുത്തിനാൽ ഭീമനസ്ത്രത്താലർജ്ജുനനും

നേടിയ വിജയമിതെങ്ങനെയെന്റേതാകും

പോരു ഞാൻ നയിച്ചില്ല വെറുതെ 'കാഴ്ച്ചക്കാര-

നായി നിന്നതേയുള്ളൂവറിയാമെല്ലാവർക്കും

എന്നിട്ടുമെന്തേയമ്മയെന്നോടു രാജാവാക

നിങ്ങനെ പറയുന്നതെന്തിനാണാവോ പാവം

ശപ്ത ജൻമമാമെന്റെ നശിച്ച കളിഭ്രാന്തിൽ

നഷ്ടമാക്കിയ രാജ്യമിന്നു വീണ്ടെടുത്തതും

ശഠരെയൊക്കെക്കൊന്നു തീർത്തതുമനിയൻമാർ

അവരിലെന്നോടുള്ള നിന്ദ ഞാനറിയുന്നു

കൃഷ്ണയും പൊറുക്കില്ല ഞാൻ മൂലമവളേറ്റ

ദു:ഖങ്ങളാർക്കായാലും പൊറുക്കാൻ കഴിയുമോ

അർജ്ജുനന സ്ത്രം കൊണ്ടു നേടിയോരവളെയ-

ന്നമ്മ തൻ വാക്കിൽ തൂങ്ങി വാഴിച്ചൂ മഹിഷിയായ്

ഇപ്പൊഴുമതോർക്കുമ്പോൾ ലജ്ജ തോന്നുന്നുണ്ടുള്ളിൽ

എങ്ങനെ സഹിച്ചുവോവർജ്ജുനൻമമഭ്രാതാ

എന്തെന്തു ത്യാഗം ചെയ്തു കൃഷ്ണക്കായ് ഭീമൻ ഞാനോ

ഉണ്ടുറങ്ങിയതല്ലാതൊന്നുമേ ചെയ്തിട്ടില്ല

അവൾ പെറ്റോരുമക്കളഞ്ചു പേരെയും

കാക്കുവാനാവാത്തൊരെൻ ജീവിതമതിനിന്ദ്യം

ഇളയ സഹോദരർ നകുല സഹദേവ-

രവരും പടവെട്ടീ ഭീരുവാമീ ഞാൻ മാത്രം

ഒളിച്ചു കഴിഞ്ഞുവെൻ മാളത്തിൽ തനിച്ചായി

ധർമ്മപുത്രരെന്നെന്നെ വിളിക്കെ കൃഷ്ണാ നിന്റെ

ചുണ്ടിലും കാൺമൂ ഞാനെന്നോടുള്ള പരിഹാസം

വേണ്ട വേണ്ടെനിക്കിനി ചേരില്ലീക്കിരീടവും

രാജ്യവും'മഹിഷിയും സ്തുതിപാഠകൻമാരും'

ഒന്നിനും കൊള്ളാത്തവൻ ശപിക്കല്ലെ നീ കൃഷ്ണേ

ഭീരുവാണിപ്പോഴും ഞാനാവില്ല നയിക്കുവാൻ