മെക്സിക്കോ വ്യാഴാഴ്ച കോവിഡ് -19 പ്രതിരോധ കുത്തിവയ്പ്പുകൾ ആരംഭിക്കും

മെക്സിക്കോ സിറ്റി:മെക്‌സിക്കോ കോവിഡ് -19 രോഗപ്രതിരോധ കുത്തിവയ്പ്പുകൾ വ്യാഴാഴ്ച ആരംഭിക്കുമെന്നും, രാജ്യത്ത് ആദ്യത്തെ ബാച്ച് ഫൈസർ-ബയോടെക് വാക്‌സിനുകൾ ലഭിച്ചതായും ആരോഗ്യ അണ്ടർസെക്രട്ടറി ഹ്യൂഗോ ലോപ്പസ്-ഗാറ്റെൽ വാര്‍ത്താ മാധ്യമങ്ങളോട് പറഞ്ഞു. ബുധനാഴ്ച ഫൈസർ വാക്സിന്റ് ആദ്യ ചരക്ക് എത്തിയെന്ന് അദ്ദേഹം ട്വിറ്ററിൽ കുറിച്ചു.

വിതരണം ചെയ്യാമെന്ന് കമ്പനി സമ്മതിച്ച 34.4 ദശലക്ഷത്തിൽ 1.4 ദശലക്ഷം ഡോസുകൾ ബെൽജിയത്തിൽ നിന്ന് എത്തുമെന്ന് നേരത്തെ വിദേശകാര്യ മന്ത്രി മാർസെലോ എബ്രാർഡ് പറഞ്ഞിരുന്നു.

ആദ്യത്തെ വാക്സിന്‍ മുൻ‌നിര ആരോഗ്യ പ്രവര്‍ത്തകര്‍ക്കായിരിക്കും നല്‍കുക. കൂടാതെ വാക്സിന് ആവശ്യമായ തണുത്ത താപനിലയുമായി ബന്ധപ്പെട്ട ലോജിസ്റ്റിക്സ് കാരണം മെക്സിക്കോ സിറ്റിയിലും വടക്കൻ സംസ്ഥാനമായ കൊഹുവിലയിലും ആദ്യം നല്‍കും.

ചൈനീസ്-കനേഡിയൻ പദ്ധതിയായ കാൻസിനോബിയോയുമായി 35 ദശലക്ഷം ഡോസിനും 77.4 ദശലക്ഷം ഡോസുകൾക്കായി ബ്രിട്ടന്റെ ആസ്ട്രാസെനെക്കയുമായും മെക്സിക്കോയ്ക്ക് വാങ്ങൽ കരാറുകളുണ്ട്. എല്ലാ രാജ്യങ്ങൾക്കും തുല്യമായ പങ്ക് ഉറപ്പുവരുത്താൻ ലക്ഷ്യമിട്ടിട്ടുള്ള അന്താരാഷ്ട്ര കോവാക്സ് സംവിധാനത്തിന്റെ ഭാഗമാണിത്. ഇത് 51.6 ദശലക്ഷം അധിക വാക്സിനുകൾ വാങ്ങാൻ അനുവദിക്കുന്നു.

മെക്സിക്കോയിൽ ഇതുവരെ 119,495 മരണങ്ങളും 1.33 ദശലക്ഷം അണുബാധകളും റിപ്പോർട്ട് ചെയ്യപ്പെട്ടിട്ടുണ്ട്. അമേരിക്ക, ബ്രസീൽ, ഇന്ത്യ എന്നീ രാജ്യങ്ങള്‍ക്കുശേഷം ഏറ്റവും കൂടുതൽ മരണങ്ങള്‍ നടന്ന നാലാമത്തെ രാജ്യമാണ് മെക്സിക്കോ.