പന്നുവിനെതിരായ ഗൂഢാലോചന; പാനൽ രൂപീകരിക്കാനുള്ള ഇന്ത്യയുടെ നീക്കം അംഗീകരിച്ച് അമേരിക്ക

ഖാലിസ്ഥാൻ ഭീകരൻ ഗുർപത്വന്ത് സിംഗ് പന്നൂനെ അമേരിക്കയിൽ  വച്ച് വധിക്കാൻ ഗൂഢാലോചന നടത്തിയെന്ന ആരോപണം അന്വേഷിക്കാൻ അന്വേഷണ സമിതി രൂപീകരിക്കാനുള്ള ഇന്ത്യയുടെ തീരുമാനത്തെ അമേരിക്ക അംഗീകരിച്ചു. യുഎസ് പ്രിൻസിപ്പൽ ഡെപ്യൂട്ടി ദേശീയ സുരക്ഷാ ഉപദേഷ്ടാവ് ജോനാഥൻ ഫൈനർ ദേശീയ സുരക്ഷാ ഉപദേഷ്ടാവ് വിക്രം മിശ്രിയുമായി തിങ്കളാഴ്ച കൂടിക്കാഴ്ച നടത്തിയിരുന്നു. "അമേരിക്കയിലെ മാരകമായ ഗൂഢാലോചനയെക്കുറിച്ച് അന്വേഷിക്കാൻ ഇന്ത്യ ഒരു അന്വേഷണ സമിതി രൂപീകരിച്ചതായും ഉത്തരവാദികളെ കണ്ടെത്തുന്നതിന്റെ പ്രാധാന്യത്തെയും ഫൈനർ അംഗീകരിച്ചു" വൈറ്റ് ഹൗസ് പുറത്തിറക്കിയ പ്രസ്താവനയിൽ പറയുന്നു.

 പന്നൂനെ വധിക്കാൻ ഗൂഢാലോചന നടത്തിയെന്നാരോപിച്ച് ഇന്ത്യക്കാരനായ നിഖിൽ ഗുപ്തയ്‌ക്കെതിരെ യുഎസ് നിയമനടപടികൾ ശക്തമാക്കിയതിനെത്തുടർന്ന് ഇന്ത്യ പ്രത്യേക അന്വേഷണ സമിതിക്ക് രൂപം നൽകിയിരുന്നു. "സിഖുകാർക്ക് പരമാധികാര രാഷ്ട്രം സ്ഥാപിക്കണമെന്ന് പരസ്യമായി വാദിച്ച ഇന്ത്യൻ വംശജനായ ഒരു യുഎസ് പൗരനെ ന്യൂയോർക്ക് സിറ്റിയിൽ വെച്ച് കൊലപ്പെടുത്താൻ പ്രതി ഇന്ത്യയിൽ നിന്ന് ഗൂഢാലോചന നടത്തി" ന്യൂയോർക്കിലെ സതേൺ ഡിസ്ട്രിക്റ്റിന്റെ യുഎസ് അറ്റോർണി ഡാമിയൻ വില്യംസ് ഒരു പ്രസ്താവനയിൽ വെളിപ്പെടുത്തി.

ആരോപണത്തിന് മറുപടിയായി വിദേശകാര്യ മന്ത്രാലയ വക്താവ് അരിന്ദം ബാഗ്ചി ഈ ആരോപണങ്ങളെ ഇന്ത്യ കൈകാര്യം ചെയ്യുന്ന ഗൗരവം പ്രതിഫലിപ്പിക്കുന്ന പ്രസ്താവനയിറക്കി. കൂടാതെ ദേശീയ സുരക്ഷയോടുള്ള ഇന്ത്യയുടെ പ്രതിബദ്ധതയ്ക്കും ഈ വിഷയങ്ങളിൽ നടന്നുകൊണ്ടിരിക്കുന്ന അന്വേഷണങ്ങൾക്കും അരിന്ദം ബാഗ്ചി ഊന്നൽ നൽകി. 

“ഈ സന്ദർഭത്തിൽ, 2023 നവംബർ 18ന്, വിഷയത്തിന്റെ പ്രസക്തമായ എല്ലാ വശങ്ങളും പരിശോധിക്കാൻ ഇന്ത്യാ ഗവൺമെന്റ് ഒരു ഉന്നതതല അന്വേഷണ സമിതിക്ക് രൂപം നൽകിയതായി അറിയിക്കുന്നു. അന്വേഷണ സമിതിയുടെ കണ്ടെത്തലുകളുടെ അടിസ്ഥാനത്തിൽ ആവശ്യമായ തുടർനടപടികൾ ഇന്ത്യാ ഗവൺമെന്റ് കൈക്കൊള്ളും,” ബാഗ്ചി കൂട്ടിച്ചേർത്തു.  ഗുപ്ത അന്താരാഷ്ട്ര മയക്കുമരുന്ന്, ആയുധക്കടത്ത് എന്നിവയിൽ സങ്കീർണ്ണമായി പങ്കാളിയായിരുന്നുവെന്ന് കുറ്റപത്രം സൂചിപ്പിക്കുന്നു.