കോഴിക്കോട്: പുതിയ ഇനം ഇഞ്ചി, മഞ്ഞള്, ഉലുവ എന്നിവ കര്ഷകരിലേക്ക് എത്തുന്നു. മഞ്ഞളിന്റെ രണ്ടും ഇഞ്ചിയുടെയും ഉലുവയുടെയും ഓരോ ഇനങ്ങളുമാണ് തയാറായിട്ടുള്ളത്. സുഗന്ധവിള ഗവേഷണ പദ്ധതികളുടെ ദേശീയ ഏകോപന സമിതിയുടെ (എഐസിആര്പിഎസ്) ദേശീയ ശില്പശാലയില് പുതിയ ഇനങ്ങള് കര്ഷകരിലേക്ക് എത്തിക്കാന് തീരുമാനം.
ഗുണമേന്മയും വിവിധ പരീക്ഷണങ്ങളും വിലയിരുത്തി ഇവ കര്ഷകരിലേക്കെത്താന് തയാറാണെന്ന് കോഴിക്കോട് ഭാരതീയ സുഗന്ധവിള ഗവേഷണ കേന്ദ്രത്തില് നടന്ന രണ്ടു ദിവസത്തെ ഓണ്ലൈന് ശില്പശാല വിലയിരുത്തി.
കോഴിക്കോട് ഭാരതീയ സുഗന്ധവിള ഗവേഷണ കേന്ദ്രത്തിലെ ശാസ്ത്രജ്ഞനായ ഡോ ഡി പ്രസാദ് ആണ് പുതിയ ഇനം ഇഞ്ചി വിത്തിന് പിന്നില്. കേരളം, കര്ണാടകം, ഒഡിഷ, പശ്ചിമ ബംഗാള് എന്നീ സംസ്ഥാനങ്ങളിലെ കര്ഷകര്ക്ക് പുത്തന് പ്രതീക്ഷ നല്കുന്നതാണ് എസിസി 247 എന്ന ഇനം വിത്ത്.
ഗുണ്ടൂരില്നിന്നുള്ള എല്ടിഎസ് 2, ഡൊപാളിയില്നിന്നുള്ള രാജേന്ദ്ര ഹല്ദി എന്നീ മഞ്ഞള് ഇനങ്ങളും ഹിസാറില്നിന്നുള്ള ഉലുവ ഇനവുമാണ് മറ്റു സുഗന്ധ വിളകള്. ഐസിഎആര് അസി. ഡയറക്ടര് ജനറല് ഡോ. വിക്രമാദിത്യ പാണ്ഡെ അധ്യക്ഷനായ സമിതിയാണ് കൃഷിപരീക്ഷണങ്ങള് അടിസ്ഥാനമാക്കി വിത്തുകള് പുറത്തിറക്കാന് തീരുമാനിച്ചത്.