കടത്താൻ ശ്രമിച്ചത് ആറ്​ ദശലക്ഷം ‘ക്യാപ്‌റ്റഗൺ’ ഗുളികകൾ! അന്താരാഷ്ട്ര മയക്കുമരുന്ന് സംഘം ഒമാനിൽ പിടിയിൽ

മസ്ക്കറ്റ്: ഒമാനിൽ ആറ്​ ദശലക്ഷത്തിലധികം ‘ക്യാപ്‌റ്റഗൺ’ ഗുളികകളുമായി എത്തിയ അന്താരാഷ്ട്ര മയക്കുമരുന്ന് കടത്ത് സംഘം പിടിയിൽ. റോയൽ ഒമാൻ പൊലീസാണ് മാരക മയക്കുമരുന്ന് കൈവശം വച്ച സംഘത്തെ അറസ്റ്റ് ചെയ്തത്.

മയക്കുമരുന്ന് ലഹരി പദാർഥങ്ങൾ ചെറുക്കുന്നതിനുള്ള ജനറൽ അഡ്മിനിസ്ട്രേഷൻ ആണ്​ ഈ സംഘത്തെ പിടികൂടിയത്​. ഏറെ നാൾ നിരീക്ഷിച്ചതിന്​ ശേഷമാണ്​ പോലീസ് സംഘത്തെ വലയിലാക്കിയത്​.

ഇവരിൽ നിന്ന് നിരവധി മയക്കുമരുന്ന് ഗുളികകൾ​ പിടിച്ചെടുക്കുകയും ചെയ്തു. പ്രതികൾക്കെതിരായ നിയമ നടപടികൾ ഇതിനോടകം തന്നെ പൂർത്തീകരിച്ചതായി റോയൽ ഒമാൻ പൊലീസ്​ അറിയിച്ചു.